Serik Jumanǵarın eki áýe kompanııasyna qatysty tekserýdiń mán-jaıyn aıtty
Eske sala keteıik, bıyl naýryz aıynyń sońynda QR Prezıdenti Qasym-Jomart Toqaev Básekelestikti qorǵaý jáne damytý agenttiginiń tóraǵasy Serik Jumanǵarındi qabyldady.
Osy oraıda «Bogatyr Kómir» jaýapkershiligi shekteýli seriktestigine, «Eır Astana» aktsıonerlik qoǵamyna, «Skat» aktsıonerlik qoǵamyna qatysty, sondaı-aq, dárilik zattar naryǵyndaǵy monopolııaǵa qarsy tergeýler júrgizilip jatqany aıtyldy.
«Air Astana málimetterdiń aqparattar bazasyna, kompanııanyń qarjylyq eseptiligine qatysty derekterdi berýden bas tartty. Osynyń barlyǵyn joqqa shyǵardy. Biz barlyq sotta jeńip shyqtyq, sondaı-aq tek aqparat usynbaǵany úshin 20 mln teńge aıyppul salyp, sot oryndaýshylaryna tapsyrdyq», - dedi S. Jumanǵarın «QazAqparat» HAA» AQ tilshilerimen kezdesý barysynda
Osy oraıda ol agenttik áýe kompanııasyna qatysty monopolııalyq joǵary baǵa boıynsha tekserýdi áli de aıaqtamaǵanyn jetkizdi. Bul turǵyda bılet qunynyń ósýine qatysty fakti tekserildi.
«Tekserý 2019-2020 jyldary júrgizildi. Ol kezde agenttik qurylmaǵan edi. Qazirgi kezde kompanııaǵa qatysty shara qabyldaýdy pysyqtap jatyrmyz. Qorytyndy aqparatty alǵannan keıin tıisti sheshim jasalady», - dedi agenttik basshysy.
Munymen qosa S. Jumanǵarın SCAT áýe kompanııasy barlyq aqparat usynǵanyn, ol boıynsha daıyn sheshim bar ekenin aıtty.
«SCAT –ta kelisim komıssııasyna quqyǵy bar. Tekserý týraly qorytyndy berilgennen keıin, olarda bizdiń sheshimge qarsylyq tanýǵa qajetti ýaqyt bar. Degenmen olarda da monopolııalyq joǵary baǵa baıqalyp otyr. Qos kompanııaǵa birdeı tásildi paıdalanymyz, ıaǵnı jazalaý nemese qandaı da bir ýaǵdalastyq bolýy yqtımal. Sebebi qazirgi kezde syrtqy naryqtar jabyq, ishki naryqtar qysqaryp qaldy. Bizdiń kez kelgen jazamyz tutynýshylarǵa, jolaýshylarǵa áser etpeı qoımaıdy», - dedi agenttik tóraǵasy.
