Serik Jumanǵarın bıtým naryǵyn deldaldardan qalaı tazartatynyn aıtty

NUR-SULTAN. QazAqparat – Básekelestikti qorǵaý jáne damytý agenttiginiń tóraǵasy Serik Jumanǵarın zańnamaǵa «bıtým qoımasy» termınin engizýdi usyndy, dep habarlaıdy QazAqparat tilshisi.

«Jol qurylysyna qajet bıtýmdy alǵashqy satý naryǵynda «Qarajanbasmunaı», «Petrosun» jáne «Gazpromneft-Bıtým Qazaqstan» sııaqty 3 oıynshy ústemdikke ıe. Munda qyzyq jaǵdaı qalyptasqan. Aqtaý bıtým zaýyty jyl saıyn bıtýmnyń búkil kólemin satyp alady. Sodan keıin bıtým qatań shemalar boıynsha deldaldar arqyly satylady. Bastapqy baǵa 65-70 myń teńgeden bastalǵanyna qaramastan, jyl sońyna qaraı, bıýdjet qarajaty bólinetin maýsymǵa qaraı bıtýmnyń quny 200 myń teńgege jetedi», - dep túsindirdi básekelestikti qorǵaý jáne damytý agenttiginiń basshysy.

Serik Jumanǵarınniń sózine qaraǵanda, bul protsesti retteý ońaı sharýa emes.

«Bıyl bul naryqtan deldaldardy yǵystyramyz. Sol úshin zańnamaǵa «bıtým qoımasy» termınin engizýdi usynamyz. Zaýyt bıtýmdy tikeleı ınfraqurylym ıelerine ǵana sata alady. Tıisinshe, osy talaptardy nyǵaıtý úshin Indýstrııa mınıstrligimen kelisip jatyrmyz. Jol salýshy kompanııalar bıtým saqtaıtyn qoımasy joq deldaldardan satyp alýǵa quqyly emes. Bul bıtým satý tizbegin tuıyqtandyrady. Qaǵaz júzinde alyp-satqysh deldaldar naryqtan ketedi», - dedi agenttik tóraǵasy.