Serik Jumanǵarın: 51 biryńǵaı operatordyń 25-i mártebesinen aıyrylady
«Memlekettik satyp alý salasyndaǵy taǵy bir mańyzdy másele bar. Tek bir kózden satyp alýǵa jol beretin negizdemelerdi ǵana emes, osy qyzmetti paıdalanatyn mekemelerdiń sanyn da qysqartý kerek. ıAǵnı, bir kózden satyp alýǵa quqyly mekemelerdiń sanyn azaıtý kerek», - dedi ol «QazAqparat» halyqaralyq aqparat agenttiginiń alańynda ótken Orep Space kezdesýde.
Onyń sózine qaraǵanda, Qazaqstanda memlekettik monopolııanyń 18 túri ǵana bar. Onyń bári qatań rettelgen. Alaıda memlekettik-jekeshelik áriptestik aıasynda jumys isteıtin biryńǵaı operatorlardyń jumysyn retteý qajettigi týyndap otyrǵan kórinedi.
«Zań boıynsha olar da konkýrssyz satyp alýǵa quqyly. ıAǵnı, bul tetik Memlekettik satyp alý týraly zańnyń normalaryn, Kásipkerlik kodeksiniń memlekettik monopolııamen baılanysty normalaryn aınalyp ótý úshin engizilgen. Memleket basshysy bizge osy biryńǵaı operatorlardyń jumysyn retteýdi tapsyrǵan bolatyn. Biz halyqaralyq tájirıbeni zerdeledik. Onda «jalpyekonomıkalyq mańyzǵa ıe taýar» degen túsinik bar. ıAǵnı aqyly qyzmetter men taýarlardyń, atqarylatyn jumystardyń bári osy uǵymǵa kiredi. Atalǵan uǵymǵa qatysy bar operatorlardyń qyzmetin baqylaǵan bolatynbyz. Ne kórdik deısiz ǵoı? 51 operatordyń ishinde «Bolashaq» halyqaralyq baǵdarlamalar ortalyǵy, Kazakh Tourism, Kazakh Invest sııaqty 18 kásiporynnyń qyzmetin retteý qajet emes bolyp shyqty. Al 24 operatordyń jumysy memlekettik retteýdi qajet etedi. Onyń 16-sy – taza memlekettik kásiporyn. 4 kásiporyn jeke menshik bolyp sanalady. Bulardan bólek arnaıy quqyǵy bar 4 kvazımemlekettik kásiporynnyń jumysyn retteý kerek», - dedi Serik Jumanǵarın.
Sondaı-aq, ol 2025 jylǵa deıin atalǵan 51 biryńǵaı operatordyń 25-i qysqartylatynyn eske saldy.
«Onyń ishinde 11 kásiporyn boıynsha túbegeıli shara qabyldadyq. Ekeýiniń jumysyn ońtaılandyramyz da, 9-yn «operator» mártebesinen aıyramyz. Bul 9-dyń beseýi jeke menshikke berilse, qalǵan tórteýi «operator» mártebesinsiz memlekettik organǵa baǵynyshyty kásiporyn bolyp qalady. Olardyń da satyp alýlar kezinde eshqandaı basymdyqtary bolmaıdy. Bul usynystardy ázirge Prezıdent ákimshiligi qoldap otyr. Jalpy 2025 jyldyń aıaǵyna deıin 20-25 operatordy mártebesinen aıyrý josparlanyp otyr. Bul alańdy tazartsaq, shaǵyn jáne orta bıznes ókilderi úshin 47 mlrd teńgeniń qyzmet kórsetý jáne taýar naryǵyna jol ashylady», - dedi agenttik tóraǵasy.
