Serik Jaqsybekov Astana qalasy máslıhatynan Senat depýtattyǵyna kandıdat retinde usynyldy
ASTANA. QazAqparat - Serik Jaqsybekov qazannyń 1-inde ótetin QR Parlamenti Senaty depýtattarynyń saılaýyna kandıdat retinde usynyldy. Bundaı sheshim Astana qalalyq máslıhatynyń kezekten tys otyrysynda qabyldandy.
«QR Parlamenti Senaty depýtattyǵyna kandıdat retinde Astana qalasy máslıhatynyń depýtaty, «Nur Otan» partııasynyń múshesi, «Tsesna» koporatsııasy» AQ dırektorlar keńesiniń tóraǵasy Jaqsybekov Serik Ryskeldiulyn usynamyn», - dedi kandıdatýra usyný týraly sóz sóılegen máslıhat depýtaty Qaırat Ahmetov.
Bul rette Qaırat Ahmetov kandıdattyń ómirbaıanyna qysqasha toqtala kele, onyń elordadaǵy tuńǵysh kásipkerlerdiń biri ekenin, qazirgi tańda «Tsesna» korporatsııasyna basshylyq jasap otyrǵanyn málim etti. «Serik Ryskeldiuly máslıhat depýtaty retinde de aǵymdaǵy jumystarǵa etene aralasyp, sessııalarda belsendilik tanytty», - dedi ol. Talqylaý barysynda qalalyq máslıhat S. Jaqsybekovtiń kandıdatýrasyn qoldap, biraýyzdan usyný týraly sheshim qabyldady.
Eske sala keteıik, QR Prezıdentiniń Jarlyǵymen QR Parlament Senaty depýtattarynyń saılaýy aǵymdaǵy jylǵy qazannyń 1-ine taǵaıyndaldy. Soǵan oraı, senator retinde kandıdattardy usyný máslıhattar sessııalarynda, sondaı-aq ózin-ózi usyný tártibimen júzege asyrylady. Budan bólek, saıası partııalar men qoǵamdyq birlestikter máslıhattardaǵy ókilderi arqyly óz kandıdattaryn usyný múmkindigi de bar.
Jaqsybekov Serik Ryskeldiuly 1956 jyly 1 naýryzda Qostanaı oblysy Qarabalyq aýdany Bórli aýylynda dúnıege kelgen. 1979 jyly Tselınograd aýyl sharýashylyǵy ınstıtýtyn (Astana qalasy) aýyl sharýashylyǵynyń elektrıfıkatsııasy mamandyǵy boıynsha, 1997 jyly - Qazaq Memlekettik basqarý akademııasy janyndaǵy naryq ınstıtýtyn halyqaralyq ekonomıkalyq qatynastar mamandyǵy boıynsha bitirgen.
Tselınograd elektr júıeleri kásiporyndaryn basqardy. Qazaqstan KP Shortandy aýdandyq komıteti uıymdastyrý bóliminiń ınstrýktory, aýdandyq mamandandyrylǵan sharýashylyq birlestigi partııa komıtetiniń hatshysy, Tselınograd qalalyq atqarýshy komıteti tóraǵasynyń kómekshisi, Tselınograd qalalyq ákimshiligi basshysynyń keńesshi-konsýltanty, Aqmola Tselınnyı aımaqtyq kedeni bastyǵynyń orynbasary, QR QM Aqmola oblysy boıynsha Kedendik basqarmanyń bastyǵy qyzmetterin atqardy.
1997 jyldan bastap 2007 jylǵa deıin - «Tsesna» korporatsııasy» AQ Basqarmasynyń tóraǵasy, 2007 jyldyń naýryzynan - «Tsesna» korporatsııasy» AQ Dırektorlar keńesiniń tóraǵasy.
