Serik Shápkenov: Jastar praktıkasyna qatysqandardyń 62%-y ǵana turaqty jumys tapqan

NUR-SULTAN. QazAqparat – Jastar praktıkasyna qatysqandardyń 62%-y ǵana turaqtyn jumys tapqan. QR Eńbek jáne halyqty áleýmettik qorǵaý mınıstri Serik Shápkenov vedomstvonyń keńeıtilgen alqa májilisinde osyndaı málimet keltirdi, dep habarlaıdy QazAqparat tilshisi.

Mınıstr 2021 jyly «Eńbek» memlekettik baǵdarlamasy aıasynda jumyspen qamtýǵa járdemdesýdiń belsendi sharalarymen 815 myńnan astam adam qamtylǵanyn habarlady. 486 myń adam jumysqa ornalastyrylsa, onyń ishinde 402 myń adam turaqty jumys tapqan.

«Jumyspen qamtýdyń jol kartasy aıasynda 247 joba júzege asyrylýda. Kartanyń birinshi baǵyty boıynsha 10,9 myń jumys orny quryldy. Sonymen qatar, 566 myń jumys orny memlekettik jáne jeke bastamalar aıasynda quryldy.

2021 jyldyń qazan aıynda kásipkerlikti damytýǵa arnalǵan ulttyq joba bekitildi. Bıyl jumyspen qamtý sharalarymen 700 myń adamdy qamtý josparlanyp otyr

Onlaın oqytý múmkindikterin keńeıtý maqsatynda Skills.enbek.kz portalynyń jumysy jalǵasady», - dedi Serik Shápkenov.

Sonymen qatar, mınıstr iske asyrylyp jatqan sharalardyń tıimdiligin arttyrý qajet ekenin atady.

«2021 jyly 180 myńnan astam adam sýbsıdııalanatyn jumys oryndaryna jiberildi. Bul qural halyqty jumyspen qamtýda qajet. Alaıda, qajetti tásilderdi qaıta qarastyrý qajet. Óıtkeni ýaqytsha jumys aıaqtalǵannan keıin barlyq qatysýshy turaqty jumysqa ornalasa bermeıdi. 2021 jyldyń qorytyndysy áleýmettik jumys oryndarynan soń qatysýshylardyń 78%-y, jastar praktıkasynan keıin 62%-y, al qoǵamdyq jumystardan keıin tek 32%-y turaqty jumysqa ornalasty. Nur-Sultan, Almaty jáne Shymkent qalalarynda turaqty jumys oryndaryna ornalasý kórsetkishi eń tómen», - dedi vedomstvo basshysy.

Onyń aıtýynsha, keıbir jumys berýshiler óz shtaty bolmasa da, sýbsıdııalanatyn jumys oryndaryn paıdalanýda.

«Áriptester, sýbsıdııalanatyn jumys oryndaryna joldama berý jumyssyzdyq máselesin sheshpeıdi. Jumys berýshilermen jumys atqarý qajet. Áleýmettik jumys oryndary keıinnen jumyssyzdar úshin turaqty jumysqa ornalasýǵa tramplın ispetti bolýy tıis», - dedi Serik Shápkenov.

Osyny eskergen mınıstrlik jumys oryndaryn sýbsıdıaılaý sharttaryn qatańdatqan kórinedi.

«Birinshiden, qurylatyn sýbsıdııalanatyn jumys oryndarynyń sany uıymnyń shtat sanyna baılanysty bolady.

Ekinshiden, qatysýshylardyń jalaqy mólsheri ulǵaıtyldy, qatysý merzimderi, sýbsıdııalanatyn jumys oryndaryna qatysýshylar kontıngenti qaıta qaraldy.

Jumyspen qamtýǵa járdemdesýdiń barlyq sharalaryn avtomattandyrý boıynsha jumys júrgizilip jatyr. Sybaılas jemqorlyq táýekelderin boldyrmaý úshin qyzmet kórsetý protsesine adam faktorynyń qatysýy barynsha qysqartylatyn bolady», - dedi mınıstr.