Serik Sápıev jol qurylysy kezinde kıikterdi umytpaýdy eskertti
ASTANA. QazAqparat - Búgin QR Parlamenti Májilisiniń plenarlyq otyrysynda depýtat, Olımpıada chempıony Serik Sápıev jol salý jumystary kezinde jabaıy túz taǵylaryn umytpaýǵa úndedi, dep xabarlaıdy QazAqparat.
«Aqtóbe-Maqat» tasjolyn salý kezinde bizge jabaıy janýarlardy da eskerýimiz kerek dep sanaımyn», - dedi Serik Sápıev.
Májilismen mysal retinde kıikterdi keltirdi. Olardyń mıgratsııalyq joldary eskerilmese, kıikter kóp shyǵynǵa ushyraýy múmkin.
«Osy oraıda, joldardy qıyp ótetin jabaıy janýarlardyń qaýipsizdigi úshin qandaı sharalar jasalady?», - dedi Serik Sápıev QR Investıtsııalar jáne damý mınıstri Jeńis Qasymbekke qoıǵan saýalynda.
Óz kezeginde QR IDM basshysy «Aqtóbe-Maqat» jol ýchaskesinde mıgratsııalyq aýmaqtar joq ekendigin aıtty.
«Biz ózge organdarmen keńesemiz, QR Aýyl sharýashylyǵy mınıstrliginen arnaıy ruqsat alamyz. Kórshi jatqan ýchaskelerde, mysaly Arqalyqtan Yrǵyzǵa, ary qaraı Aqtóbege baratyn jolda kıikterdiń mıgratsııalyq aýmaqtary bar. Ol joldardy jobalap jatyrmyz, onda popýlıatsııanyń ótýine qajetti ótkelder jasalady», - dep túsindirdi Qasymbek.
Aıta keteıik, búgin QR Parlamenti Májilisiniń plenarlyq otyrysynda «Qazaqstan Respýblıkasy men Azııa Damý banki arasyndaǵy zaım týraly kelisimdi ratıfıkatsııalaý jónindegi» zań jobasyn maquldady.
Ol kelisim boıynsha, «Aqtóbe-Maqat» tasjolyn qaıta jańartýǵa 230,3 mıllıon AQSh dollaryn alý kózdelgen. Salynatyn joldyń uzyndyǵy - 299 shaqyrym.
