Serik Sápıev jańa qyzmetine kiristi
ASTANA. 18 qańtar. QazAqparat - London olımpıadasynan keıin sportpen qosh aıtysqan Serik Sápıev bıylǵy 14 qańtardan bastap Qazaqstan boks federatsııasynda (QBF) ákimshilik qyzmettegi jumystaryna resmı túrde kiristi, dep habarlaıdy «Astana Sport» sporttyq basylymy.
Budan bylaı 2012 jyldyń olımpıada chempıony - QBF-nyń sporttyq dırektory retinde elimizdegi boks salasynyń damýyn qadaǵalaıtyn bolady. Qazir Serik basqarý isiniń qyr-syryn meńgerýde, alaıda boks salasyn odan artyq biletin adamdardyń sanaýly ekeni shyndyq. «Men bokstyń ishki jan-dúnıesin bilemin, - deıdi Serik Sápıev. - Óıtkeni men bul salada kópten beri júrmin. Qazirdiń ózinde bilmeıtinimdi bilip, tájirıbe jınaqtaýdamyn. Qazaqstannyń boks federatsııasyna jańa qyzmetimde de paıdamdy tıgizemin dep oılaımyn. Sol úshin barymdy salatyn bolamyn».
Sondaı-aq, sportshy QBF-nyń prezıdenti Tımýr Qulybaevqa ózine múmkindik bergeni úshin alǵysyn bildirip, senimin aqtaýǵa tyrysatynyn aıtty.
QBF-nyń shtaby Astanada ornalasqandyqtan, sportshy elordaǵa kóship kelmek. Olımpıada chempıonynyń sózderine qaraǵanda, ázirshe ol ózi ǵana kelgen, al otbasy kóshýge daıyn bolmaǵandyqtan Qaraǵandyda qalyp qoıǵan.
