Serik Sápıev sport jýrnalısterin merekesimen quttyqtady
NUR-SULTAN. QazAqparat - Búgin Sport komıtetiniń tóraǵasy Serik Sápıev Halyqaralyq sport jýrnalısteri kúnine oraı BAQ ókilderin quttyqtady, dep habarlaıdy QazAqparat tilshisi.
«Qurmetti sport jýrnalısteri! Sizderdi Halyqaralyq sport jýrnalısteri kúnimen shyn júrekten quttyqtaımyn. Sportshylarymyzdyń jeńisin qalyń buqaraǵa jetkizýdegi eńbekterińiz zor. Siz ben biz bolyp el sportynyń damýyna odan ary eńbek ete beremiz dep senemin. Jazar kóbeısin, quttyqtaımyn», - degen vıdeo quttyqtaýynda.
Aıta keteıik, búgin, ıaǵnı 2 shilde - halyqaralyq sport jýrnalısteriniń kúni.
1924 jyly 2 shilde kúni Parıjde Halyqaralyq sport basylymdary qaýymdastyǵy (AIPS) qurylǵan bolatyn. Al Halyqaralyq sport jýrnalısteri kúni 1995 jyldan bastap atalyp ótedi. Búginde AIPS-tiń quramyna álemdegi 130 memlekettiń sport jýrnalısteri kiredi. Olardyń qatarynda Qazaqstan sport basylymdary qaýymdastyǵy da bar.
Qazaqstan sport basylymdary qaýymdastyǵy da Halyqaralyq sport jýrnalısteri kúnin erekshe atap ótedi.
