Serik Sápıev: Poltoranınniń túsinikteme berýin áli kútip otyrmyz
ASTANA. QazAqparat - QR Mádenıet jáne sport mınıstrligi Sport jáne dene shynyqtyrý komıtetiniń tóraǵasy Serik Sápıev qazaqstandyq shańǵyshy Alekseı Poltoranınniń basyndaǵy daýǵa qatysty jaǵdaıdyń qandaı bolyp jatqanyn aıtyp berdi, dep habarlaıdy QazAqparat tilshisi.
«Odan aýstrııalyq polıtsııa jaýap aldy. Bálkim, ol materıaldardy WADA-ǵa jóneltilgen de shyǵar. WADA áli de tergeý júrgizip jatyr. Tergeýdiń qashanǵa deıin jalǵasatynyn bilmeımiz. Ony saıystarǵa sportshy retinde qatysý múmkindigi toqtatylyp otyr. Biz áli de kútip otyrmyz», - dedi Serik Sápıev Memlekettik qyzmet isteri jáne sybaılas jemqorlyqqa qarsy is-qımyl agenttiginde ótken baspasóz máslıhatynan keıin tilshilerge suraqtaryna bergen jaýabynda.
Onyń aıtýynsha, tergeý amaldary uzaqqa sozylyp ketetin bolsa, mınıstrlik naqty sheshimniń qashan jarııalanatyny jaıly suraqpen WADA-ǵa shyǵatyn bolady.
- Poltoranın men bapkerine elge kelip, jaǵdaıdy túsindirýdi talap ettińizder me?
- Meniń oıymsha, ol jaqynda kelip, bálkim keń-molynan suhbat beredi. Ázirge ol demalyp jatyr. Meniń topshylaýymsha, ol eshkimmen kezdeskisi kelmeıtin sekildi.
- Siz ol jaǵdaıdan beri Alekseımen sóılestińiz be?
- Biz onymen birneshe ret sóılestik. Moraldyq turǵydan qoldaý bildirdim. Qashan ushyp keletinin suramadym.
- Onyń Máskeýde týystary bar ma?
- Iá.
- Mádenıet jáne sport mınıstrligi aıyppul sanktsııalaryn engizýdi oılastyryp jatqan joq pa?
- Joq, álbette. Ázirge qarastyryp jatqan joqpyz.
- Ekıpırovkany qaıtarý sekildi reglamentter oryndala ma?
- Qazirgi ýaqytta qandaı da bir aıyppul nemese qaıtarym, ákimshilik tárkileý qarastyrylmaǵan. Jýyrda antıdopıngtik ereje boıynsha zań kúshine enedi...
- Demek, ol Máskeýde jatyp alyp eshkimmen baılanysqa shyqpaý quqyǵyna ıe me?
- Joq ondaı quqyǵy joq.
- Mınıstr (Arystanbek Muhamedıuly - avt.) Poltoranınniń resmı málimdeme jasaıtynyn aıtqan edi. Dese de, áli sportshy únsiz...
- Biz adamdy májbúrleı almaımyz. Kelip, baspasóz máslıhatynda jaǵdaıdy túsindirer dep oıladyq. Ázirge kútip otyrmyz. Meniń oıymsha, ol báribir kelip, jaǵdaıdy túsindiredi.
Eske sala ketsek, 27 aqpanda nemis jýrnalısi Haıo Zeppelt Týıtterde Aýstrııanyń Zeefelde qalasynda shańǵy jarysynan ótip jatqan álem chempıonatynda Qazaqstan, Aýstrııa men Estonııa sportshylary antıdopıngtik erejelerdi buzdy degen kúdikke ilingenin jazdy. Olardyń qatarynda Alekseı Poltoranın da bar. Sportshynyń bapkeri atalmysh oqıǵaǵa baılanysty málimdeme jasaǵan edi.
Al QR Mádenıet jáne sport mınıstri Arystanbek Muxamedıuly Poltoranınmen baılanysta ekendigin habarlady.
