Serik Sápıev pen Baqtııar Artaev júzdegen astanalyqpen birge jattyǵý jasaldy
ASTANA. QazAqparat - Búgin elordanyń trıatlon-baǵynda qoǵam nazaryn gıpodınamııa máselesine aýdartýǵa jáne de belsendi ómir saltyn damytýǵa baǵyttalǵan «Densaýlyq festıvali-2017» ótti, dep habarlaıdy qalalyq ákimdiktiń baspasóz qyzmeti.
Bıyl festıval elimizde salaýatty ómir saltyn qalyptastyratyn qyzmettiń qurylǵanyna 20 jyl tolýyna arnalǵan. Sharanyń uıymdastyrýshylary - Astana qalasynyń ákimdigi, densaýlyq saqtaý basqarmasy, salaýatty ómir saltyn qalyptastyrý ortalyǵy.
Festıval 2016-2019 jyldarǵa arnalǵan «Densaýlyq» medıtsına salasyn damytý memlekettik baǵdarlamasynyń sharalar josparyn júzege asyrý aıasynda ótti.
Astana qalasynyń densaýlyq saqtaý basqarmasy basshysy Kamaljan Nadyrov festıvaldiń ashylýynda qala turǵyndary buqaralyq sportty nasıhattaıtyn osyndaı sharalarǵa belsendi qatysa bastaǵanyn aıtty.
«Jalpy Astanany sport qalasyna jatqyzýǵa bolady. Sizder bilesizder, Astanada kóptegen buqaralyq sporttyq sharalar ótip turady. Sondyqtan men oılaımyn, bizdiń turǵyndarymyz mundaı sharalarǵa úırengen jáne osyndaı bastamalarǵa sózsiz, jaqsy qabyldap, qatysady. Jyl saıyn sportpen shuǵyldanatyn adamdar sany kóbeıetinine senimdimin. Bul óte durys! Óıtkeni, fızıkalyq belsendilik deńgeıi ulttyń damýymen, mádenıet deńgeıimen tikeleı baılanysty», - deıdi Kamaljan Nadyrov.
Sonymen qatar, dárigerler salaýatty ómir saltyn nasıhattap júretinin aıtty. Atap ótý kerek, dárigerler dertti emdeýmen kúresedi, al ár adam óz densaýlyǵyn oılaý tıis. Bul adam balasynyń uranyna aınalýy kerek.
«Astanada kún saıyn eshqandaı qosymsha shyǵynsyz, ár turǵyn óz densaýlyǵyna kóńil bólý úshin jaqsy jaǵdaı jasalýy kerek», - dep atap ótti Densaýlyq saqtaý basqarmasynyń basshysy.
«Densaýlyq festıvali-2017» sharasy barysynda olımpıada chempıondary Serik Sápıev jáne Baqtııar Artaevpen birge jattyǵý jasaldy.
Sondaı-aq festıval aıasynda birqatar sharalar ótti. Atap aıtar bolsaq, «Júrý marafony», «Biz salaýatty ómir salty úshin» aktsııasy «Saý rýh» uranymen jarys, «Meniń denimniń saýlyǵy - elimniń saýlyǵy» fleshmoby uıymdastyryldy.
Budan bólek djıý-djıtsý stılinde jekpe-jekshiler, skandınavtyq júrý boıynsha sport sheberleri,ártister úlgilik óner kórsetti. Sonymen qatar elorda ardagerlerimen jappaı jattyǵý jasaldy.
Keń aýqymdy aktsııaǵa elordanyń barlyq qyzyǵýshylyq tanytqan turǵyndary men qonaqtary qatysty.
Jarystarda erekshe kózgen túsken sportshylar Astana qalasy ákimdiginiń Alǵys hattarymen, baǵaly syılyqtarymen marapattaldy.
