Serik Sápıev óziniń salmaq dárejesindegi úsh izbasaryn jarııa etti

Bul jaıynda búgin chempıon Astanadaǵy «Shýaq» jastar densaýlyq ortalyǵynda jetkinshektermen kezdesý barysynda málim etti.

«Sizdiń salmaǵyńyzda Qazaqstan quramasynda laıyqty izbasarlar kimder?»-dep qoıylǵan saýalǵa S. Sápıev: «Qazaqstan quramasynda úsh boksshy bar. Onyń biri Shyǵys Qazaqstan oblysynan Manat Ómirzaqov jáne Astanadan eki bylǵary qolǵap sheberi bar. Olar - Baqytjan Qojabekov pen Danııar Eleýsinov»,-dep jaýap qaıtardy.

Aıta keteıik, London Olımpıadasynda Danııar Eleýsinov 64 kelide shyqqan edi.

Halyqaralyq boks qaýymdastyǵy London olımpıadasynan keıin álemdik reıtıngti jarııalaǵan bolatyn. Qazaqstandyq olımpıada chempıony Serik Sápıev 69 kelide kósh bastap tur.

Budan buryn habarlanǵandaı,  S.Sápıev bolashaqqa áli naqty jospar qurmaǵanyn da aıtyp otyr. Negizi memlekettik qyzmetke turǵysy keletinin jasyrmaıdy, alaıda 2016 jylǵy olımpıada men 2013 jylǵy álem chempıonattaryna qatysý múmkindigin de joqqa shyǵarmaıdy.

 «Eger de sol kezde sportta júrsem, onda álem chempıonatyna ótýge barymdy salamyn, - dedi ol. - Qazir jattyqtyrýshy bolǵym kelmeıdi. Rıo týraly aıtý da áli erte, 4 jyl degen biraz ýaqyt».