Serik Sápıev Olımpıada oıyndary týraly: Biz áli nátıje kórsetemiz

NUR-SULTAN. QazAqparat – Tokıo Olımpıadasyndaǵy tómen nátıje úshin sport túrleriniń bas bapkerleri jaýapty bolady. Bul týraly QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Serik Sápıev aıtty, dep habarlaıdy QazAqparat.

«Ár jarystan keıin bizde talqylaý, keńeıtilgen jınalys ótkiziledi. Árıne, osy Olımpıadadan keıin de bul nátıjeniń sebepteri anyqtalady. Sodan keıin ǵana qandaı sharalar qabyldaý kerektigin sheshemiz. Eger qatelikter jiberilse nemese nátıje bolmasa, shara qabyldaımyz. Joǵaryda aıtyp ótkenimdeı, aldyn ala qorytyndy jasamaı-aq qoıaıyq. Áli basqa da sport túrleri bar. Nashar nátıjeler úshin ár sport boıynsha bas jattyqtyrýshylar jaýapty bolady. Biz olarǵa daıyndyqty senip tapsyramyz. Sondyqtan bas jattyqtyrýshylardan talap etip, tıisti sheshimder qabyldaımyz», - dedi S. Sápıev Ortalyq kommýnıkatsııalar qyzmetinde.

«Olımpıada áli ótip jatyr. Sportshylarymyzǵa qoldaý kórseteıik. Biz áli nátıje kórsetemiz», - dep qorytyndylady S. Sápıev.

Aıta keteıik, Tokıoda ótip jatqan Olımpıada oıyndarynyń medaldar kestesinde Qazaqstan qorjynynda burynǵysha úsh «qola» ǵana bar. Júldegerler – dzıýdoshy Eldos Smetov, aýyr atletter Igor Son jáne Zúlfııa Chınshanlo.