Serik Sápıev: Memleket tarapynan Olımpıada sportshylaryna bar jaǵdaı jasaldy

NUR-SULTAN. QazAqparat – Sport jáne dene shynyqtyrý isteri komıtetiniń tóraǵasy Serik Sápıev Tokıo Olımpıadasyndaǵy Qazaqstan quramasynyń jaı-kúıi týraly pikir bildirdi, dep habarlaıdy QazAqparat tilshisi.

«Olımpıada jaqsy bolyp jatyr. Aıta ketetinim, memleket tarapynan, Mádenıet jáne sport mınıstrligi, Ulttyq Olımpıada komıteti jáne sport túrleri boıynsha federatsııa tarapynan sportshylarǵa Olımpıada oıyndaryna sapaly daıyndalyp, tabysty óner kórsetýine baǵyttalǵan barlyq qajetti jaǵdaı jasaldy. Onyń ishinde materıaldyq qarjylandyrý, oqý-jattyǵý jıyndary, kóptegen halyqaralyq jarystar, medıtsınalyq turǵydan sharalar jasaldy. Ózderińiz bilesizder, sportta úmittiń aqtala bermeıtinin este saqtaǵan jón. Alaıda qazaqstandyq sportshylardyń árqaısysy laıyqty nátıje kórsetýi úshin bar kúsh-jigerin salady dep senemiz», - dedi Serik Sápıev Ortalyq kommýnıkatsııalar qyzmetinde brıfıngte.

Aıta keteıik, Tokıodaǵy Olımpıadada Qazaqstan quramasynda sporttyń 28 túrinen 97 joldama bolǵan edi. Ázirge Qazaqstan qorjynynda úsh «qola» medal bar. Olardy dzıýdoshy Eldos Smetov jáne aýyr atletter Igor Son men Zúlfııa Chınshanlo jeńip aldy.