Serik Sápıev mádenıet pen sportty bólý máselesine qatysty pikir bildirdi

NUR-SULTAN. QazAqparat – Búgin Ortalyq kommýnıkatsııalar qyzmetinde ótken onlaın baspasóz máslıhatynda tilshiler elimizdiń Mádenıet jáne sport mınıstrliginen sportty bólip alatyn ýaqyt jetken joq pa, degen saýal qoıdy.

QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Serik Sápıevtiń sózinshe, bul óte jan-jaqty oılastyrylyp baryp sheshim qabyldaýdy qajet etetin kúrdeli másele.

«Qıyn suraq. Bul jerde mınıstrliktiń quzyretimen qatar, qarjy máselesi de retteýdi qajet etedi. Árıne, eger basshylyq bólý kerek dep tapsa. Qazirgi tańda barlyq memlekettik organdarda qyzmetkerlerdi qysqartý júrip jatyr, sondyqtan bul másele tereń taldaýdy kerek etedi», - dep jaýap berdi S. Sápıev tilshiniń suraǵyna.

Sondaı-aq, komıtet basshysy buryn mádenıet pen sporttyń bólek bolǵanyn da alǵa tartty.

«Buryn sport mınıstrligi jáne agenttigi bolǵan. Degenmen ýaqyt óte kele basshylyq mádenıet pen sportty biriktirý qajet dep sheshti. Bizge qazir eki sala bólek bolǵan kezde jaǵdaı qandaı boldy, qazir qandaı degen máseleni muqııat zerdelep alý kerek», - deıdi ol.

Buǵan deıin S. Sápıev Olımpıada oıyndarynda óner kórsetken boksshylardy ónerine baǵasyn berdi.

Odan bólek, Sport jáne dene shynyqtyrý isteri komıtetiniń tóraǵasy Tokıo Olımpıadasy oıyndarynan soń sportshylar jáne olardy jattyqtyrýshy bapkerlerdiń qatysýymen keńeıtilgen otyrys ótetinin aıtty. Onda jiberilgen kemshilikter talqylanbaq.