Serik Sápıev qazaqstandyqtardyń depýtattarǵa qandaı máselemen kóp júginetinin aıtty

ASTANA. QazAqparat - QR Parlamenti Májilisiniń depýtattaryna túsetin ótinishterdiń basym bóligi baspana máselesin sheshýmen baılanysty. Bul týraly búgin Elbasynyń 5 áleýmettik bastamasyn talqylaýǵa arnalǵan Qazaqstan jastarynyń forýmynda Májilis depýtaty Serik Sápıev aıtty, dep habarlaıdy QazAqparat.

«Saılaýshylarmen qansha kezdessek te aldymyzdan shyǵatyn, qanshama hat keletin eń úlken problema baspana bolyp otyr. Bizge kelip túsetin ótinishterdiń shamamen 70 paıyzy turǵyn úı problemasyna qatysty bolady. Al Prezıdenttiń bul jolǵy usynysy qoǵamdaǵy osynaý problemany sheshýdiń bir joly dep bilemin. Durys usynys jasaldy, mindet aıqyn», - dedi ol.

Sonymen qatar depýtat bilim alýǵa qosymsha 20 myń grant bólý, elimizdiń soltústik óńirlerin, onyń ishinde Astanany gazdandyrý máselesin sheshý qoldan keletindigin atap ótti.

Aıta keterligi, keshe QR Parlamenti palatalarynyń birlesken otyrysynda Elbasy Nursultan Nazarbaev qazaqstandyqtardy baspanamen qamtamasyz etýge baǵyttalǵan jańa baǵdarlamany jarııa etken bolatyn.