Serik Sápıev «GGG-Rolls» anderkartynda Eleýsinovtiń shyqpaýyna qatysty pikir bildirdi
«Bul týraly ne aıtýǵa bolady? Men kásipqoı bokstyń qyr-syryn tolyq bilmeımin. Іri aıqastardyń anderkartyna sportshylardy qalaı qosatynynan azdap habarym bar. Bul - olardyń qarym-qatynastary. Ózderi sheship alar. Ekeýi de otandasymyz. Danııardy atalmysh tizimge nelikten qospaǵanyn bilmeımin. Bálkim, belgili bir nıýanstar bar shyǵar. Onyń bárin aqyryna deıin bilmeımiz», - dedi Serik Sápıev bodıbıldıngten elordada ótetin Orta Azııa chempıonatyna arnalǵan baspasóz máslıhatynan keıin QazAqparat tilshisine.
Serik Sápıev óz sózinde kásipqoı boksta ártúrli jaǵdaılar bolyp jatatynyn tilge tıek etti.
«Sebebi, kásipqoı boksta árbir boksshy belgili bir qarsylasty shaqyrady delik. Al shyntýaıtynda ol osy shaqyrýymen úlken gonorar surap turǵan bolar. Máselen, aǵylshyn boksshysy Djo Sonders keýdesin toqpaqtap, Golovkındi jekpe-jekke shaqyrdy. Gena álbette, onymen qýana-qýana shyǵar edi. Biraq, Sonderstiń promoýterleri Golovkınniń kóńilinen shyqpaıtyn sharttardy atady. Al shyntýaıtynda basymdyq Golovkınde edi. Ol - «A» sanatyndaǵy boksshy. Olar bolsa, meniń oıymsha, ádiletsiz sharttardy usynǵan bolýy kerek. Bul rette Golovkın negizgi shartty ataıtyn boksshy edi. Olar bolsa, eshbir boksshy kelispeıtindeı shartty usyndy. Sondyqtan, aıqas ta uıymdastyrylmady. Osyndaı nıýans bar. Sol sekildi, Golovkın men Eleýsinovte de... Bilmeımin, bálkim, ol jerde de qandaı da bir ishki nıýanstar bar shyǵar. Kópshilikke aqparat taratylyp ketedi. Al bul jerde ekeýi de aıtqysy kelmeıtin belgili bir jaı bolýy múmkin. Biz bilmeımiz», - dedi Serik Sápıev.
Eske sala ketsek, taıaýda Danııar Eleýsinovtiń Golovkınniń jekpe-jeginde óner kórsetpeıtini belgili bolǵan edi. Boksshynyń menedjeri Zııa Alıev Sports.kz-ke bergen suhbatynda Eleýsinovtiń 8 maýsymdaǵy Golovkın-Rolls anderkartyndaǵy jekpe-jegi belgisiz sebepterge baılanysty bolmaıtynyn jetkizgen.
Keıin bul máselege qatysty QR Kásipqoı boks federatsııasynyń vıtse-prezıdenti Vıktor Demıanenko pikir bildirip, Golovkın men Eleýsinov arasynda qandaı da bir túsinbeýshilik bar degenge senbeıtinin aıtqan bolatyn.