Serik Sápıev, Danııar Eleýsinov bastaǵan chempıondar kitaphanaǵa jeke zattaryn syılady
NUR-SULTAN. QazAqparat – Qazaqstannyń Olımpıada chempıondary men ózge de tanymal sportshylary elordadaǵy QR Tuńǵysh Prezıdenti-Elbasy kitaphanasyna jınalyp, jeke zattaryn syıǵa tartty, dep habarlaıdy QazAqparat.
Búgin Elbasy kitaphanasynda dańqty qazaqstandyq sportshylar, túrli sport uıymdarynda tárbıelenýshi jetkinshekter men Parlament depýtattarynyń qatysýymen «Qazaqstan maqtanyshy» sport-revıýi ótti.
Elbasy kitaphanasy Táýelsizdiktiń 30 jyldyǵyna oraı «Qazaqstan maqtanyshy» atty aýqymdy jobany qolǵa alyp otyr. Joba bıylǵy 8 naýryzda «Bolashaq» halyqaralyq baǵdarlamasynyń 30 úzdik túlegimen ótken ınteraktıvti kezdesýden bastaý aldy.
Al búgingi shara barysynda Olımpıada chempıondary men Qazaqstannyń ataqty sportshylarynyń jeke zattaryn Elbasy kitaphanasynyń mýzeıine syıǵa tartý rásimi ótti.
Atap aıtqanda, qazaqstandyq mánerlep syrǵanaýshy Elızabet Tursynbaevanyń ákesi Baıtaq Tursynbaev álem chempıonatynda qyzynyń tórttik salhov jasap, Qazaqstandy álemdik qysqy sport tarıhyna qosqan konkıin tabystady.
Serik Sápıev 2009 jylǵy álem chempıonatyna kıip barǵan formasyn syıǵa tartty. Grek-rım kúresiniń sheberi ıÝrıı Melnıchenko jeńip alǵan kóptegen kýboktarynyń birin syı etti. Kórkem gımnastshy Álııa Júsipova halyqaralyq týrnırden músinsheni, ataýly medal men taıaqshasy bar lentany tabys etti. Aýyr atlet Ilıa Ilın murajaı kollektsııasyn 2014 jylǵy altyn medalmen tolyqtyrdy. Danııar Eleýsinov mýzeıge óziniń «altyn» boks qolǵabyn tapsyrdy. Erkin kúres sheberi Gúzel Manıýrova «jeńisti» trıkosyn berdi. Qazaq kúresinen belgili sportshy Beıbit Ystybaev 2015 jyly Elbasynyń ózi tapsyrǵan belbeýdi usyndy. Djıý-djıtsý sheberi Móldir Mekenbaeva 2019 jyly Mońǵolııada ótken Azııa chempıonatynyń medaldaryn tartý etti. Darhan Nortaev Qazaqstan djıý-djıtsý qaýymdastyǵynyń atynan Álem chempıonatynyń Kýbogyn tapsyrdy. Sonymen qatar, Qazaqstan baıkerler qaýymdastyǵynyń prezıdenti Dmıtrıı Petrýhın óz oljalaryn Elbasy kitaphanasyna ótkizdi.
Іs-sharada alyp kúsh ıesi, kúsh qoldanatyn nómirler arasyndaǵy álemniń tórt dúrkin rekord ıesi, Qajymuqan Muńaıtpasov pen Balýan Sholaqtyń murasyn jalǵastyrýshy, QR Mádenıet jáne sport mınıstrliginiń elimizdegi kúsh mádenıetin damytý jónindegi ókili Sergeı Tsyrýlnıkov ta boı kórsetti. Qonaqtardyń aldynda ol kúsh ónerin pash etip, at taǵasyn maıystyrdy. Keıinnen taǵany mýzeıdiń qoryna ótkizdi.
Sport-revıý barysynda sportshylar tapsyrǵan jeke zattar men muraǵat materıaldary Elbasy kitaphanasynyń ekspozıtsııalarynan laıyqty oryn taýyp, jurtshylyqtyń ıgiligine aınalady.
Sondaı-aq jıyn barysynda QR Tuńǵysh Prezıdenti – Elbasy kitaphanasy men QR Mádenıet jáne sport mınıstrligi arasynda yntymaqtastyq týraly memorandýmǵa qol qoıyldy. Qujatty Elbasy kitaphanasynyń dırektory Baqytjan Temirbolat pen QR MSM Sport jáne dene shynyqtyrý isteri komıtetiniń tóraǵasy Serik Sápıev bekitti.
