Serik Sápıev bokstan ótken Azııa chempıonaty týraly pikir bildirdi
NUR-SULTAN. QazAqparat – Sport jáne dene shynyqtyrý isteri komıtetiniń tóraǵasy Serik Sápıev el sportyndaǵy sońǵy jańalyqtarǵa pikir bildirdi, dep habarlaıdy QazAqparat.
«Búgin bul jerge jaǵymdy sebeppen jınalyp otyrmyz. Jansaıa Ábdimálikti osy jetistigimen quttyqtaımyn jáne qurmetimdi bildirgim keledi. Qazaqstan sportyndaǵy sońǵy jańalyqtar biz úshin jaǵymdy bolǵanyn aıtqym keledi. Bokstan ótken Azııa chempıonatynan bastasaq, jalpykomandalyq esepte Qazaqstan quramasy birinshi orynǵa ıe boldy. Áıelder quramasy 8 altyn medal jeńip aldy. Ókinishke qaraı, erler quramasynyń nátıjesi sonshalyqty tabysty bolǵan joq. Biraq laıyqty sheberlik pen sapa kórsetti deýge bolady», - dedi komıtet basshysy.
Serik Sápıev «Rolan Garros» týrnırinde Qazaqstannyń atynan óner kórsetip jatqan tennısshilerdiń jetistigine de toqtaldy.
«Elena Rybakına Qazaqstan tarıhynda alǵash ret álemniń burynǵy úzdik raketkasy Serena Ýılıamsty jeńdi. Andreı Golýbev pen Aleksandr Býblık te atalǵan týrnırdiń shırek fınalyna ótip otyr», - dedi ol ortalyq kommýnıkatsııalar qyzmetinde ótken brıfıngide.
Komıtet basshysy hokkeı quramasynyń toptyq kezeńniń syn saǵatynda múmkindikti qoldan jiberip alǵanyn da eske saldy.
«Hokkeıshi jigitterimiz Álem chempıonatynyń pleı-off kezeńine bir attam jerden qaıtqanyn bilesizder. Degenmen, bul da úlken jetistik. Sońǵy jańalyq - dzıýdoshy Ǵusman Qyrǵyzbaev Álem chempıonatynda kúmis medal jeńip aldy. Barlyq sportshylarymyzdy quttyqtaımyn. Árıne, Jansaıa Ábdimáliktiń jeńisi erekshe! Siz erler arasynda halyqaralyq grossmeıster boldyńyz. Alda budan da úlken jetistikterge jetip, elimizdiń ımıdji úshin úlken nátıjelerge jetýińizge tilektespin», - dedi Serik Sápıev.
Eske salsaq, Bokstan Birikken Arab ámirliginiń Dýbaı qalasynda ótken Azııa birinshiliginde Qazaqstannyń erler quramasy bes kúmis medal alǵan bolatyn.
Buǵan deıin habarlaǵanymyzdaı, Memleket basshysy Qasym-Jomart Toqaev Jansaıa Ábdimálikti FIDE Gran-prıindegi jeńisimen quttyqtaǵan bolatyn.
Eske salsaq, atalmysh týrnırdegi jetistigi úshin otandasymyz erler arasyndaǵy halyqaralyq grossmeıster atanǵan edi.
