Serik Sápıev bir kezderi álem chempıony atanýyna kedergi bolǵan boksshymen kezdesti
ASTANA. QazAqparat - Bokstan Olımpıada chempıony, QR Parlamenti Májilisiniń depýtaty Serik Sápıev Gollıvýdta ýkraındyq boksshy, áýesqoılar men kásipqoılar arasynda álem chempıony Taras Shelestıýkpen kezdesti, dep habarlaıdy QazAqparat «SPORTINFORM» SAA-ǵa silteme jasap.
S. Sápıev óziniń Instagramdaǵy paraqshasynda AQSh-qa jasaǵan týrnesinen Shelestıýkpen birge túsken sýretin jarııalady.
«Rıngtegi qarsylasymmen, ómirdegi dosymmen. With friend», - dep jazdy Serik sýrettiń astyna.
Taras Shelestıýk Serik Sápıevti Bakýdegi Álem chempıonaty - 2011 fınalynda qazaqstandyqty jeńip, onyń úsh dúrkin álem chempıony bolýyna múmkindik bermegen edi. Qazir ýkraınalyq boksshy kásibı boksta baǵyn synap júr. Ol WBO NABO tıtýlyn ıelendi.
