Serik Sápıev bapkerlerdiń mártebesin kóterýdi usyndy

ASTANA. QazAqparat - QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Serik Sápıev pedagog mártebesi sııaqty bapkerlerdiń de mártebesin kóterýdi usyndy, dep habarlaıdy QazAqparat tilshisi.

Bul týraly komıtet tóraǵasy Astanada ótken «Deni saý adamdardyń myqty ultyn qalyptastyrý» atty paneldik sessııada aıtty.

«Bapkerlerge túsetin úlken júktemeni eskere otyryp, olardyń bapkerlik saǵattaryn jalpy orta bilim beretin mektep muǵalimderiniń saǵattarymen teńestirý qajet. Sonymen birge, pedagog mártebesi sekildi bapkerlerdiń de mártebesin kóterý qajet dep esepteımin. «Pedagog mártebesi týraly» zań jobasyna bapker mártebesin de qosý kerek», - dedi ol.

Onyń aıtýynsha, bapkerlerdiń bar ýaqyty issaparlarda ótedi.

«Ulttyq quramadaǵy bapkerlerimiz 9 aı boıy issaparda, daıyndyqta, jarystarda júredi. Jeke ómiri men otbasyna bir jyldyń 3 aıyn ǵana bóle alady. Sondyqtan, bapker mártebesin kóterý máselesin talqylaımyz», - dedi Serik Sápıev.