Serik Sápıev Atyraý sportshylarynyń jańajyldyq estafetasyna qosyldy
ATYRAÝ. QazAqparat - Serik Sápıev jańajyldyq shyrshany medaldarymen bezendirip, Atyraý sportshylarynan estafeta qabyldady, dep habarlaıdy «QazAqparat» HAA tilshisi.
Olımpıada chempıony ári QR Parlamenti Májilisiniń depýtaty barsha qazaqstandyq sportshylarǵa vıdeojoldaý arnap, Atyraýdan bastalǵan erekshe merekelik estafetaǵa qosyldy.
«Shyrshany óz medaldarymmen bezendirip, atyraýlyq sportshylar bastaǵan chempıondyq chellendjige qoldaý bildireıin dep sheshtim. Memleket basshysy únemi sportty nasıhattaý qajettigin aıtady, mundaı sharalar sol múddege qyzmet etedi. Estafetany barsha sportshylarǵa joldap, onyń uzaqqa jalǵasýyn tileımin», - dedi Serik Sápıev.
Eske sala ketsek, chempıon shyrshasyn alǵash ret 24 jeltoqsan kúni Atyraý sportshylary medaldarymen bezendirgen bolatyn. 26 jeltoqsanda qaraǵandylyq sportshylar ony jalǵastyrdy, 27 jeltoqsanda ıgi rásimdi Olımpıada chempıony Serik Sápıev qabyldady. Atyraýlyq sportshylardyń bastamasyna belgili bylǵary qolǵap sheberi Madııar Áshkeev te qoldaý bildirdi. Sportshy AQSh-tyń Los-Andjeles qalasyndaǵy shyrshalardyń birine Qazaqstannyń Memlekettik týyn jaýyp, estafetany Serik Sápıevten qabyldady.
