Serik Sápıev astanalyq stýdentterge ómirlik ustanymdary týraly aıtyp berdi
ASTANA. 30 mamyr. QazAqparat - Búgin Astanada L. Gýmılev atynda Eýrazııa ulttyq ýnıversıtetinde qazaqstandyq boksshy, Olımpıada chempıony Serik Sápıev stýdentterge óziniń ómirlik ustanymdary týraly aıtyp, lańkestikke qatysty pikirimen bólisti.
"Men árqashan Allaǵa sengenmin. Sportshy retinde rıngke shyǵar aldynda árdaıym ımanymdy aıtyp shyǵamyn. Árbir dinde adamǵa qastandyq jasamaý, urlyqqa barmaý, zınaqorlyqqa boı aldyrmaý sııaqty zańdar bar shyǵar. Men osyndaı prıntsıptermen ómir súremin. Kóptegen sportshylar ıslamdy qabyldaǵany belgili. Maık Taıson, Muhammed Alı syndy musylmandyqqa moıynsunǵan ataqty adamdar bar", - dedi álemniń eki dúrkin chempıony.
Onyń aıtýynsha, lańkestik - adamǵa qastandyq jasaýmen teń. Al ol óz kezeginde ıslam dinimen tyıym salynǵan.
"Lańkestik - kez kelgen adam óltirý qylmysy sekildi úlken qylmysqa jatady. Sondyqtan oǵan jol berilmeýi tıis. Sizderge óz senimderińdi taýyp, ımanǵa kelýlerińizdi tileımin", - dedi sóz sońynda S.Sápıev.
Aıtka keteıik, sharany QR Din isteri agenttigi jáne ýnıversıtet basshylyǵy ótkizdi. Oǵan tanymal dintanýshy sarapshylar, naıb-ımamdar men ıslamtanýshy ǵalymdar, stýdentter qatysty.
