Serik Sápıev - AIBA reıtınginde birinshi orynda tur
ASTANA. Aqpannyń 11-i. QazAqparat - Aǵymdaǵy aptada jarııalanǵan AIBA (Áýesqoı bokstyń halyqaralyq federatsııasy) reıtıngi boıynsha Serik Sápıev 69 keli salmaq sanatynda birinshi orynǵa shyqty.
Serik ótken jyldyń qyrkúıek aıynda ótken bokstan álem chempıonatyna deıingi kóshbasshylyq ornyn saqtap qala aldy, dep habarlaıdy Týrızm jáne sport mınıstrliginiń baspasóz qyzmetinen.
Túrli salmaq sanattaryndaǵy álemniń úzdik boksshylarynyń reıtıngine 23 qazaqstandyq kirip otyr. Atap aıtqanda, alǵashqy ondyqqa Jaqypov Birjan (48 keli salmaqta), Artaev Baqtııar (75 keli), Shynalıev Erkebulan (81 keli) jáne Myrsataev Rýslan (91 keliden joǵary salmaqta) kirgen.
Taǵy bir aıta ketetin jaıt, Beıjiń Olımpıadasynan keıin sporttyq mansabyn toqtatqanyna qaramastan, Baqyt Sársekbaev jeńip alǵan upaı sandary boıynsha áli kúnge deıin AIBA reıtınginde saqtalǵan, ol 69 kelige deıingi sanatta 4-shi orynda tur.
Reıtıng sportshylardyń Olımpıadalyq oıyndardaǵy, álem chempıonattarynda, jastar arasyndaǵy álem chempıonattarynda, olımpıadalyq biliktilik chempıonattary men Konfederatsııa kýbogynda jınaǵan upaılarynyń sany boıynsha jasalyp otyr.
