Serik Musadilov AQSh-ta rıngke shyǵady

ASTANA. QazAqparat – Birinshi aýyr salmaqtaǵy qazaqstandyq boksshy Serik Musadilov (13-0, 11KO) 21 qazanda Orlandoda (AQSh, Florıda shtaty) sharshy alańǵa shyǵady, dep habarlaıdy QazAqparat «Qazaqstannyń kásipqoı boksy» paraqshasyna silteme jasap.

BoxRec.com habarlaýynsha, «Panda» laqap atymen belgili qazaqstandyqtyń qarsylasy meksıkalyq Haver Gomes Rýeda (21-17, 15KO) bolady. Jekpe-jek segiz raýndtan turady.

S.Musadilov munyń aldyndaǵy jekpe-jegin 8 qyrkúıekte Santıago de Tolýda (Kolýmbııa) ótkizdi. Onda jergilikti sportshy Manýel Bankesti ekinshi raýndta nokaýtqa túsirgen bolatyn.

Rýedaǵa keletin bolsaq, ol 23 shildede Orlandoda rıngke shyǵyp, amerıkalyq Adrıan Pıneırodan (9-0, 9KO) tehnıkalyq nokaýtpen jeńilgen edi. Aıta keteıik, 2018 jyly Haver rıngte taǵy bir qazaqstandyq Álı Ahmedovpen kezdesken bolatyn. Olardyń jekpe-jegi Kosta-Mesada (Kalıfornııa) ótip, birinshi raýndta nokaýtpen almatylyq boksshynyń jeńisimen aıaqtaldy.

Foto: vk.com/kazproboxing