Serik Qusaıynov: Ata Zań - bizdiń azattyq alǵaly atqarǵan isterimizdiń altyn tarazysy (FOTO)
Óziniń alǵy sózinde Almaly aýdanynyń ákimi Serik Qusaıynov búgingi dýmanǵa jınalǵan qala turǵyndary men qonaqtaryn Konstıtýtsııa kúnimen quttyqtap, Ata zańnyń táýelsiz Qazaqstan tarıhynda alar ornynyń erekshe ekendigin atap ótti.
«Ata Zań - bizdiń azattyq alǵaly atqarǵan barlyq isterimizdiń altyn tarazysy! Sondyqtan, Ata Zańdy ardaqtaý - keleshekke kerýen tartqan memleketimizdiń árbir azamatynyń asyl paryzy. Egemen elimizdiń memlekettiligin, táýelsizdigin, demokratııalyq qundylyqtaryn aıǵaqtaıtyn birden bir qujat - bul Konstıtýtsııa. Osyny umytpaıyq. Búkil el bolyp, halyqtyq referendým negizinde qabyldanǵan Ata Zań - Qazaqstan halqynyń kúndelikti ómiriniń aınasyna aınaldy. Búginde turaqtylyǵy nyǵaıyp, tynyshtyǵy buzylmaǵan elderdiń qatarynda turmys keshýimiz jıyrma jyldyq tarıhy bar Ata Zańymyzdyń arqasy. Ata zańymyz - táýelsizdigimizdiń tiregi», - dedi Serik Qusaıynov.
Budan keıin aýdan ákimi kámelet jasqa tolyp, eresek ómirge aıaq basqan úsh jetkinshekke tólqujat tabys etti.
Іs-shara barysynda uıymdastyrylǵan merekelik kontsertte Qazaqstan estradasynyń ataqty juldyzdary: Sulýshash Nurmaǵambetova, Arman Dúısenov, Qaragóz Tileýbekova, QR Memlekettik «Saltanat» bı ansambli, Respýblıkalyq jáne halyqaralyq án baıqaýlarynyń laýreattary, «Móldir» bı ansambli jáne aýdan mektepteriniń ónerpaz jastary óz ónerlerin ortaǵa salyp, jınalǵan qaýymdy tánti etti.
Sonymen qatar, jasóspirimder arasynda asyq atý, arqan tartý sekildi ulttyq oıyndar boıynsha jarystar uıymdastyryldy. Jeńimpazdarǵa estelik syılyqtar tabys etildi.