Serik Kúdebaevtyń shekarany zańsyz keskenine qatysty is Taldyqorǵanda qaralmaıdy

TALDYQORǴAN. QazAqparat - Serik Kúdebaevtyń shekarany zańsyz ótkenine qatysty is Taldyqorǵanda qaralmaıdy, dep habarlaıdy QazAqparat tilshisi.

Bul jóninde Jetisý oblysynyń prokýrory Madııar Basshybaev málimdedi.

«Bul oqıǵa Jetisý oblysynda emes, basqa óńirde boldy. Sondyqtan is sol jaqta qaralyp jatyr. Tolyqqandy aqparat alý úshin sol oblystyń prokýratýrasyna habarlasyńyzdar»,- dedi Madııar Basshybaev.

Biraq prokýror Serik Kúdebaev isine qatysty sot otyrysy qaı oblysta ótetinin aıtpady.

Esterińizge sala keteıik, Serik Kúdebaev 28 sáýir kúni 10 jylǵa sottalǵan bolatyn.

Oǵan laýazymdyq ókilettigin asyra paıdalaný jáne azaptaý baptary boıynsha aıyp taǵyldy.

Aıta keteıik, ol bıylǵy 30 naýryz kúngi sot otyrysyna kelmedi. Sondyqtan ony sotqa májbúrli túrde jetkizý jóninde qaýly shyqty.

Artynsha generaldyń elden qashyp ketkeni belgili bolyp, Taldyqorǵan qalalyq soty Serik Kúdebaevqa halyqaralyq izdeý jarııalady.

27 sáýirde Serik Kúdebaev Túrkııada ustalyp, elge jetkizildi.

Almaty oblystyq polıtsııa departamentiniń burynǵy basshysy Serik Kúdebaev qańtar oqıǵasy boıynsha kúdikti dep tanylǵan edi.