Serik Kúdebaevtyń Óskemen túrmesindegi sýretine baılanysty qyzmettik tergeý júrgiziledi

ASTANA. QazAqparat – Almaty oblystyq polıtsııa departamentiniń burynǵy bastyǵy, Qańtar oqıǵasynan keıin sottalǵan Serik Kúdebaevtyń Óskemen túrmesindegi sýreti jelige tarap ketýine baılanysty qyzmettik tekserý bastalady, dep habarlaıdy QazAqparat tilshisi.

Bul týraly Qylmystyq atqarý júıesi komıtetiniń baspasóz qyzmeti málimet taratty.

«Qazirgi tańda sottalǵandardyń uıaly telefon qoldanýy jáne beınebaqylaý kamerasynyń obektıvin jaýyp tastaý faktisi boıynsha qyzmettik tergeý taǵaıyndaldy. Qylmystyq atqarý júıesi komıteti jeke quramnyń zańdylyqty buzýyna qatysty túbegeıli ustanymǵa berik. Kelip túsken ár aqparat tyńǵylyqty tekseriledi. Zań buzylǵan jaǵdaıda qoldanystaǵy zańnama aıasynda shara qoldanylady», - delingen komıtettiń resmı málimetinde.

Ondaǵylardyń sózinshe, Serik Kúdebaev pen janyndaǵylar jaıǵasqan dastarhannyń ústinde tártipke qaıshy keletin azyq-túlik ónimi joq.

«ІІM buıryǵymen bekitilgen ishki tártip erejeleri boıynsha qlymystyq atqarý júıesinde qamaýda otyrǵan sottalýshylar azyq-túlikti syrttan sálemdeme retinde nemese týysqandarymen kezdesken kezde qabyldaýǵa haqyly. Olar ol tamaqty arnaıy bólingen orynda bos ýaqyttarynda tutyna alady. Bul talap qylmystyq atqarý júıesindegi mekemelerdiń barlyq túrine ortaq. Aldyn ala málimet boıynsha, Shyǵys Qazaqstan oblystyq qylmystyq atqarý júıesi departamentiniń №22 mekemesinde sottalǵandar týysqandarynan daıyn tamaq qabyldap alǵan. Tekserý kezinde tyıym salynǵan azyq-túlik ónimderi tabylǵan joq», - dep jazady komıtettiń baspasóz qyzmeti.

Esterińizge sala keteıik, Serik Kúdebaev 28 sáýir kúni 10 jylǵa sottalǵan bolatyn.

Oǵan laýazymdyq ókilettigin asyra paıdalaný jáne azaptaý baptary boıynsha aıyp taǵyldy.

Ol bıylǵy 30 naýryz kúngi sot otyrysyna kelmedi. Sondyqtan ony sotqa májbúrli túrde jetkizý jóninde qaýly shyqty.

Artynsha generaldyń elden qashyp ketkeni belgili bolyp, Taldyqorǵan qalalyq soty Serik Kúdebaevqa halyqaralyq izdeý jarııalady.

27 sáýirde Serik Kúdebaev Túrkııada ustalyp, elge jetkizildi.

Almaty oblystyq polıtsııa departamentiniń burynǵy basshysy Serik Kúdebaev qańtar oqıǵasy boıynsha kúdikti dep tanylǵan edi.