Serik Kúdebaev Alataý arqyly shekarany kesip ótken bolýy múmkin - UQK

ASTANA. QazAqparat – Almaty oblystyq polıtsııa departamentiniń burynǵy bastyǵy Serik Kúdebaev taýly jer arqyly shekara kesip ótýi múmkin. Bul týraly Ulttyq qaýipsizdik komıteti tóraǵasynyń orynbasary – Shekara qyzmetiniń dırektory Erlan Aldajumanov aıtty, dep habarlaıdy QazAqparat tilshisi.

«Qyrǵyzstanmen memlekettik shekara 1 257 shaqyrymǵa sozylyp jatyr. Almaty baǵytynda bizde Alataý taýly alqaby bar. Menińshe, nıet bolsa jáne bul baǵytta kúzetýge qajet tehnıkalyq quraldar joq ekenin eskere otyryp osy taýlar arqyly memlekettik shekarany kesip ótý múmkindigi bar. Muny anyqtaý úshin tekserý júrgizilip jatyr», - dedi Erlan Aldajumanov Májilistiń jalpy otyrysynan keıin BAQ ókilderiniń saýalyna oraı.

Onyń dereginshe, kúdiktiniń qaıda ekenin anyqtaý úshin Ulttyq qaýipsizdik komıtetimen birlesken top qurylǵan.

Sonymen qatar Іshki ister mınıstrligi men ózge de memlekettik organdar janynda arnaýly top jumys istep jatyr.

5 shekara beketiniń 300-ge jýyq qyzmetkeri de osy jumysqa jumyldyrylǵan.

Sonymen qatar ol BAQ ókilderiniń Serik Kúdebaevtyń qashyp ketkeni jaıly aqparat nelikten kesh jarııalanǵany týraly saýalyna jaýap berdi.

«Biz onyń qashyp ketken-ketpegenin bilmedik. Buǵan deıin de atap ótkenimdeı, ol memlekettik shekarany resmı ótkizý pýnkteri arqyly kesip ótken joq», - dedi ol.

Eske sala keteıik, 3 sáýirde Serik Kúdebaevqa halyqaralyq izdeý jarııalanǵan bolatyn.

Alaıda, búgin kúdiktiniń el aýmaǵynan tysqar boı tasalaǵanyn shekara qyzmeti naýryzdyń 27-i kúni bir-aq bilgeni anyqtaldy.