Serik Qonaqbaev Mońǵolııa prezıdentimen kezdesti
ASTANA. QazAqparat - Mońǵolııa prezıdenti Haltmaagıın Battýlga Halyqaralyq áýesqoı boks qaýymdastyǵynyń (AIBA) vıtse-prezıdenti, Azııa boks konfederatsııasynyń (ASBC) prezıdenti Serik Qonaqbaevty qabyldady, dep habarlaıdy QazAqparat.
Kezdesýde taraptar Azııa aımaǵynda boksty damytý perspektıvalaryn jáne mońǵol boksshylarynyń álem birinshilikterindegi jetistikterin talqylady.
«Mońǵolııa Azııadaǵy boks damyǵan jetekshi elderdiń biri ári osy mártebesin laıyqty qorǵap keledi. Elde memleket tarapynan sportty damytýǵa basa nazar aýdarylýda. Qazirgi kezde mońǵolııalyq boksshylardyń aldynda Olımpıadanyń altyn medalin jeńip alý mindeti tur», - dedi Serik Qonaqbaev.
Mońǵolııa prezıdenti Azııa boksyn damytýǵa qosqan súbeli úlesi úshin Serik Qonaqbaevty «Altyn juldyz» ordenimen marapattady.
Serik Qonaqbaev Mońǵolııa Ulttyq olımpıadalyq komıtetiniń prezıdenti Demchıdjav Zagdsúrenmen kezdesip, álemdik olımpıadalardaǵy mońǵol boksynyń bolashaǵy talqylandy. Mońǵolııanyń Ulttyq olımpıadalyq komıteti Serik Qonaqbaevty «Olımpıada dańqy» qurmetti medalimen marapattady.
20 maýsym kúni Mońǵolııanyń astanasynda bokstan dástúrli halyqaralyq Ulaanbaatar Box Cup týrnıri bastaldy. Oǵan 12 memleketten kelgen 120-dan astam boksshy qatysyp jatyr.
