Serik Qonaqbaev AIBA jumysy jaıly: Áýesqoı boks ımıdjine nuqsan keltirilýde
ASTANA. QazAqparat - Búgin Rım qalasynda Halyqaralyq áýesqoı boks qaýymdastyǵy (AIBA) Atqaýshy komıtetiniń kezekten tys otyrysy bastalady, dep habarlaıdy «QazAqparat» HAA tilshisi.
AIBA otyrysy Italııa astanasynda 15-16 qańtar kúnderi ótedi. Atqarýshy komıtet otyrysynyń kún tártibinde birqatar máseleler, atap aıtqanda, qarjy, zańnamalyq jáne uıymdastyrýshylyq sharalary talqylanbaq.
«Bizdiń uıym júıeli daǵdarysty bastan ótkerýde. Bul bizdiń jumystyń barlyq tarmaǵynda kórinis tabýda. Qarjy salasyndaǵy janjaldar, tórelik boıynsha oqıǵalar, durys eseptelmegen menedjment, aqyr sońynda basqarýdaǵy kollapsqa alyp keldi. Qazirgi ýaqytta «ótpeli bılik» jumysty barynsha jaqsartýǵa tyrysyp baǵýda», - deıdi Serik Qonaqbaev.
Alaıda, onyń aıtýynsha, qazirgi basqarýshy organ aldyńǵy jetekshilerdiń qatelikterin qaıtalap otyr.
«Bir ǵana mysal keltirsek. Atqarýshy komıtettiń músheleri qujattardy kúni buryn eshqashan ala almaıdy. Kez kelgen eseptik qujat oqýǵa yńǵaısyz formatta monıtor betine 5 mınýt buryn ǵana shyǵarylady. Qujattardy kem degende 10-15 kún buryn tapsyrýdy men, mine, AIBA basshylyǵynan 4-5 jyl boıy surap kelemin. Tipti, bul jaǵdaı aqparattardy ádeıi jasyrýǵa uqsap barady», - deıdi ol.
AIBA vıtse-prezıdenti Serik Qonaqbaevtyń aıtýyna qaraǵanda, Halyqaralyq áýesqoı boks qaýymdastyǵy jumysynda ashyqtyqtyń bolmaýy álemdik sporttyq arenada áýesqoı bokstyń ımıdjine kóleńkesin túsirip keledi.
