Serik Aqsuńqaruly: Keris pen kıkiljiń emes, ulttyq ujym kerek bizge

NUR-SULTAN. QazAqparat - Osynaý el basyna kún týǵan kezde bılikti kinálap, bireýimiz olaı, bireýimiz bulaı tartpaı, elimizdiń egemendigin saqtaýdyń qam-qaraketine kirisýimiz kerek. Bir qoǵamdyq-ekonomıkalyq formatsııa ketip, ekinshisi kelgen kezde orny oısyraǵan kemshilik pen qatelikter bolmaı qoımaıdy. Aqyn Serik Aqsuńqaruly Egemen Qazaqstan gazetinde jarııalanǵan maqalasynda osy másele tóńireginde oı tolǵaıdy. QazAqparat maqalanyń tolyq mátinin oqyrman nazaryna usynady.

Órkenıetti elderdiń bári de biz ótken ótkelekten ótken! Olardy bir kezde jabaıy batys degen, qazir órkenıetti elder dep ózimiz aıtamyz! Bir-birimizdi kinálaýdy toqtatyp, ultty aman alyp qalýymyz qajet! Eń bastysy – táýelsiz Qazaqstannyń irgetasy qalandy! Bul – tarıhı fakt.

Tarıhtyń ne bir ótkeleginde Atyraý-Arqa-Alataý-Altaıǵa deıingi ulan baıtaq jerdi saqtap qalǵan qazaq – uly halyq! Onyń býrjýazııasynyń da (eger ol ulttyq býrjýazııa bolsa?) sol kemeńger ultqa laıyq óziniń tarıhı sheshimin qabyldaıtyn kezi keldi! Ulttyq ekonomıkany osy daǵdarystan aman alyp shyǵatyn osylar! Eldiń yrzyǵyn quzǵynsha baýyryna basyp jemeı, qyransha shashyp jeıtin zaman keldi! Osynaý syndarly sátte óziniń baılyǵynyń, eń bolmasa 50 paıyzyn memlekettik zaımǵa aıyrbas­tap, ne kórse de kindik qany tamǵan el-jurtymen birge kórip, turalaǵan jurtyn tuıyqtan shyǵaryp alsa, tarıh aqtap, Alla jarylqaıdy ony!

Dinde «ıspoved» degen uǵym bar, kúnáhar adam balasynyń Allanyń aldyna baryp, kúnádan arylý duǵasy! Búgin bizdiń bárimiz de qos qolymyzdy ustap, sol Táńiriniń aldynda turmyz!

Kiná kóp. Memleket, qoǵam, bılik qana emes, bizdiń bárimiz de kinálimiz: aǵa-ini, qaryndas-baýyrlarymyzdy tosynnan kelgen indetten saqtap kala almadyq qoı? Bári de Adam úshin – adamnyń ıgiligi úshin deıtin qoǵam qura almadyq qoı?!

O, Táńiri! Keshe gór bizdeı kúnáhar pendeńdi!

Tarıhtyń bir sabaǵy – kedeı el órkenıet órine shyǵa almaıdy! Prezıdenttiń janyndaǵy Ulttyq qoǵamdyq senim keńesi, búginnen bastap, mine, osy máselemen aınalyssa, sheshilmeıtin túıin, alynbaıtyn asý joq bizge! Osyǵan ult, ulysymyzǵa qaramaı, bárimiz bir kisideı at salysaıyq! Oılanaıyq! Ǵalamǵa qazaqtyń qandaı ult ekenin kórsetetin kún keldi!

Bir-birimizdi baı, kedeı demeı, bir jeńnen qol, bir jerden sóz shyǵaryp, Prezıdentimizdiń mańyna jınalýymyz kerek! Kedeıge de, baıǵa da Qazaqstannyń Táýelsizdiginen basqa Tarıhı Qundylyq joq! Bizge Qazaqstannan basqa el joq! Odan basqa barar jer, basar taý joq bizge! Bir-birimizdi jaǵadan alyp, qyrqysýdy qoıyp, ulttyq kelisimge keleıik!

Erteń kesh bolady...

Urlyq aýrýy bizdiń etimizden ótip, súıegimizge jetken eken; shetelden kelgen gýmanıtarlyq kómekke aýyz sala bastaǵandar shyqty! Emhanalarda dári joq! Bar bolsa, tistegenniń aýzy, ustaǵannyń qolynda kórinedi?! Bul ne sumdyq?!

Áleýmettik jelilerge qarasań, záreń ushady! Qazaq kimniń dos, kimniń qas ekenin áli bilmeı jatyr. Otyz jyl qordalanǵan ulttyń kókeıkesti máselelerin bir kúnde sheshý múmkin emes qoı?

Prezıdent týraly jaqsy lebiz aıtý, men qazaqpyn, Qazaqstan – meniń Otanym deıtin eldiń ózine jaqsy. Bul – bizdiń elimiz! Bizde budan basqa el de, memleket te joq endi! Bizdiń budan basqa Prezıdentimiz de joq! Prezıdenttiń júzi jarqyn bolmasa, qazaqtyń bolashaǵy da kómeski bolady... Oǵan kelesi saılaýǵa deıin ýaqyt bereıik! Alǵashqy qadamynyń ózi keleshekten kóp úmit kúttirip otyr! Taıpalyq-tobyrlyq-quldyq psıhologııadan qulan-taza arylyp, qazaqqa órkenıetti ult bolatyn kezeń keldi!

Osy syndarly sátte bizdiń bárimiz de Prezıdenttiń mańaıyna toptasýymyz kerek! Onyń adaldyǵy men bıik ıntellektisine senip, bir jerden sóz, bir jeńnen qol shyǵaryp, Qazaqstannyń táýelsizdigin kózimizdiń qarashyǵyndaı saqtaýymyz qajet! Másele osynda!

Keýdeńdi qysqan qyjylyń ishińe syımaı bara jatsa, alda kósile sóıleıtin ýaqyt bar ǵoı?! Qalaı el bolamyz, qaıtyp órkenıet órine shyǵamyz, ótkennen qalaı sabaq alamyz degen naqty usynys, pikir, oılaryńyz bolsa ortaǵa salyńyz?

Serik Aqsuńqaruly,

aqyn, Qazaqstannyń eńbek sińirgen qaıratkeri