Serik Aqsholaqov - ult medıtsınasyndaǵy jańa baǵyttyń jarshysy

Birde Aqtóbege máskeýlik ataqty neırohırýrg A.N.Konovalov kelip osynaý armanshyl adamnyń qııalyna qanat bitirip, medıtsınadaǵy jańa baǵytqa qyzyǵýshylyǵyn oıatty.

Ol armanshyl adam - Búkil dúnıejúzilik dárigerler qaýymdastyǵynyń sheshimimen beriletin «Álem dárigeri» ataǵyn 2008, 2009 jyldary eki ret qatarynan ıelengen, «Platınaly Tarlan», Pırogov atyndaǵy syılyqtardyń ıegeri, «Parasat» ordenimen, birneshe medaldarmen marapattalǵan Jaratylystaný ǵylymdary akademııasynyń akademıgi, Qazaqstannyń eńbek sińirgen qaıratkeri, Ulttyq neırohırýrgııa ortalyǵy basqarmasynyń tóraǵasy, professor Serik Aqsholaqov bolatyn.

Búginde Serik Qýandyqulynyń esimin estimegen adam kem de kem shyǵar. Qashan kórseń de qarapaıym qalpynan jazbaıtyn, meılinshe eńbekqor, talapshyl basshy, úlken ǵalym, jańashyl dáriger Serik Qýandyqulynyń elimizdegi neırohırýrgııa salasyn damytýdaǵy eńbegin eshteńemen ólsheýge kelmes, sirá.

Aqsholaqov Serik Qýandyquly qazir Astanadaǵy «Neırohırýrgııa ulttyq ortalyǵynyń» basshysy, Halyqaralyq Eýrazııalyq neırohırýrgııa Akademııasynyń akademıgi, medıtsına salasynda top jarǵan dáriger-neırohırýrg. Asqaq Astanadaǵy jańa ári zamanaýı ortalyq ashylǵanǵa deıin jas maman talaı asýlardan ótti. Jalyndy jastyq shaǵyn oqýǵa, bilim ıgerýge arnady. «Tek qana alǵa júrý, toqtamaý jáne qandaı jeńis pen jetistikke jetseń de mastanba, masattanba hám kidirme» degen ómirlik ustanymymen ol Máskeýge attanǵan bolatyn. Stýdent kezinde ózin shaqyrǵan A.N.Konovalovtyń janynda bolyp, on bes jyl tájirıbe jınady, tanymal ǵalymnyń jetekshiligimen doktorlyq jumysyn qorǵady. Eń alǵashqy óziniń kúrdeli operatsııasyn da Aqsholaqov Máskeýde jasaǵan edi.

«Óz basym Qazaqstan medıtsınasynyń qaryshtap damýyn Táýelsizdikpen jáne Astanamen tikeleı baılanystyramyn. Sebebi, Táýelsizdik arqasynda Astana salynsa, sol Astanada eń bir zamanaýı klınıkalar salynýdyń qajettigi aıqyn edi. Bul oryndaldy da. Olar jáne burynǵy jolmen emes, barlyq jabdyǵy túgendelgen, tek ishine kirip, patsıentterdi emdeı berýge bolatyndaı etip salyndy. Syzylǵan jobasynyń ózinde qaı apparattyń qaı jerde turatyny vırtýaldy anyqtalyp, qabyrǵasy turǵyzylmastan buryn olardyń barlyǵy kirgizilip, kommýnıkatsııasy, asaı-múseıin tegis daıyn etip, birden paıdalanatyn emhanalar. Al biz buryn ondaı klınıkalardy bilmeıtinbiz. Sóıtse, medıtsınalyq logıstıka degen ǵylym, onyń professorlary bar eken. Bir kezderi neırohırýrgııany ashý múmkin emes, olar emdeıtin aýrýlar az, daıyn mamandar jetispeıdi, tipti joq dep esepteıtin. Al negizinde neırohırýrgııalyq kómekke zárý jandar az emes edi, tek biz olardy shaqyryp emdeı almaıtynbyz. Olar úılerinde aýyryp, aýyldarynda jatyp, emdelýge baryp jazylý kerektigin de bilmeı, ómirimen qoshtasatyn», - deıdi bilikti dáriger.

Onyń aıtýynsha, Táýelsizdik otandyq medıtsınanyń damýyna, qazaqstandyq bilikti mamandardyń da kóptep shyǵýyna tyń serpin berdi. Ásirese, buǵan Elbasynyń birinshi kezekke ult densaýlyǵyn alǵa shyǵarýy da óz jemisin bergen. Nátıjesinde Astanada ashylǵan zamanaýı ortalyq memlekettiń úlken qoldaýynda boldy.

«Klınıka ashylǵanda biz qandaı apparat surasaq ta, sonyń eń bir qoldanystaǵy zamanaýı túrleri alǵashqy kezekte turdy. Qajetti 35 mamandy 3 aıdan 6 aıǵa deıin Densaýlyq saqtaý mınıstrligi aqsha bólip, shetelge oqýǵa jiberdi. Aǵylshynsha biletini AQSh, Japonııaǵa jiberildi de, Izraıl oryssha oqytý baǵdarlamasyn usynǵasyn basym bóligi sonda attandy», - deıdi Aqsholaqov.

Osylaısha, Ortalyq ashylǵanda qurýly turǵan apparattarmen jumys isteıtin dárigerler tegis daıyn turdy. Sondyqtan buryn bolmaǵan tehnologııalardy, elimizde buryn jasalynbaı kelgen operatsııalardy jasaý múmkindigi birden týdy. Al klınıkanyń saltanatty ashylýyna Elbasy Nursultan Nazarbaevtyń ózi qatysty.

Serik Qýandyqulyn tabysqa jetelegen jan dúnıesiniń bilimge degen qulshynysy. Ómirlik kásibi osy ortalyqpen tyǵyz baılanystaǵy dárigerdiń áriptesteri men shákirtteri de jańalyqqa qumar jandar. Onyń sońǵy jyldarda tárbıelegen 5 ǵylym doktory men 15 ǵylym kandıdaty qazir árqaısysy óz jolyn taýyp bul salanyń damýyna jan-jaqty úles qosyp júr. Sonymen qatar shet eldik tanymal jýrnaldarda 100-ge jýyq ǵylymı maqalalary jarııalanǵan Serik Aqsholaqov 13 ǵylymı monografııanyń avtory. 

Qazaqstan medıtsınasynyń neırohırýrgııa salasyna ol alpystan astam operatsııa jasaýdyń jańa ádisterin engizip, ózi mı men omyrtqaǵa 5000-nan astam operatsııa jasady. Eń bastysy, otandyq operatsııalarǵa mıkroneırohırýrgııany, endoskopııalyq neırohırýrgııanyń negizderin qalyptastyrdy jáne neıronavıgatsııany alǵash qoldanysqa engizip, epılepsııany jedel emdeýdi hırýrgııa tásilimen júzege asyrdy.

Serik Qýandyqulynyń ǵylymdaǵy jetistikterine únemi qoldaý kórsetip otyrǵan jubaıy da ınemen emdeýdiń maman dárigeri. Erli-zaıypty dárigerler únemi bilimderin shyńdap, halyqqa qyzmet etýdi maqsat tutqan jandar.

«Bizdiń ortalyqta kúrdeli operatsııalar jasalady. Shynynda, kóp adam aýrýyn jasyrǵysy keledi. Der kezinde aldyn ala emdelgenniń nátıjesi óte jaqsy bolatynyn eskermeıdi. Áli de bizdiń halyqtyń densaýlyqqa kózqarasy tómendeý», - dep dáriger kókeıkesti oıymen bólisti.

Serik Aqsholaqov jetekshilik etetin Ortalyq zamanaýı jańa tehnologııalar engizýden de esh jalyqqan emes. Josparlar da barshylyq. Onsyz bolmaıtyny da taǵy belgili. Máselen, onda keler jyly jańadan kelgen gammanaıf apparatymen emdeýdi bastaý josparlanýda. Bul qurylǵy operatsııanyń aldyn alýda óte mańyzdy qyzmet atqarady. Dertine daýa izdegen jannyń aýrýyn bastapqy deńgeıinde kúıdirip, joıyp jiberý arqyly emdeıdi eken. Arnaıy ortalyqta qazir gammonaıf apparatymen jumys jasaıtyn mamandar daıyndalýda. Al aldaǵy ýaqytta klınıkanyń ǵylymı izdenisterin tereńdete túsý úshin Ortalyq Nazarbaev Ýnıversıtetimen tyǵyz qarym-qatynasyn arttyra beredi. Bul Aqsholaqovtar sekildi joǵary bilikti mamandardyń arqasynda ult saýlyǵynyń deńgeıi de joǵary deńgeıde qamtamasyz etiletinin bildiredi.