Serik Aqsholaqov Semeıde birneshe naýqasqa ashyq mı otasyn jasady
SEMEI. QazAqparat - Qazaqstannyń bas neırohırýrgy birneshe semeılik turǵynnyń mıyna kúrdeli ota jasady, dep habarlaıdy QazAqparat.
«Ulttyq neırohırýrgııa ortalyǵy» AQ Basqarma tóraǵasy, QR bas neırohırýrgy, akademık Serik Aqsholaqov jáne Semeı qalasynyń Medıtsına ýnıversıtetiniń neırohırýrgııa bóliminiń mamandary birlesip 4 qala turǵynyna kúrdeli ota jasady. Semeıge arnaıy kelgen professor «Bastyń tamyr patologııasyn endovaskýlıarly emdeý» taqyrybynda sheberlik saǵatyn ótkizip, mıǵa ashyq operatsııalar jasady. ıAǵnı, naýqastardyń mıyndaǵy qan tamyrynyń isken bóligin alyp tastady. Birneshe santımetrge ósken isik naýqastyń ómirine qaýipti. Óıtkeni jarylyp, mıǵa qan quıylýy múmkin.
«Barlyq ota sátti aıaqtaldy. Ota óte kúrdeli. Sebebi, mı tamyryna jasalady. Sondyqtan qatelik jibermeý kerek, áıtpese mı qyzmetine keri áser etedi.
Búgingi kúni bastyń tamyr patologııasynyń endovaskýlıarly embolızatsııalanýy óte aýyr sanattaǵy aýrýǵa jatqyzýǵa bolady. Bul mıdyń túrli fýnktsııalarynyń buzylýyna, nátıjesinde, naýqastyń ólýine ákelýi múmkin. Mıdyń eń usaq tamyrlaryna jasalatyn mundaı operatsııalar, joǵary tehnologııalyq medıtsınalyq kómek qataryna jatady», - deıdi Serik Aqsholaqov.
Mundaı kúrdeli otalarqazirdeSemeı qalasynyń Memlekettik medıtsına ýnıversıtetiniń ýnıversıtettik gospıtalinen basqa tek Astana jáne Almaty qalalarynda ǵana jasalady.
