Serik Aqsholaqov: Qazir medıtsına aldyndaǵy maqsat – indetten shyǵý
NUR-SULTAN. QazAqparat – Qazir búkil kúsh pen oıdy indetke qarsy jumyldyryp, halyqqa durys aqparat jetkizý kerek. Elde órshigen indetke qatysty Memlekettik syılyqtyń laýreaty, Ulttyq neırohırýrgııa ortalyǵynyń basqarma tóraǵasy Serik Aqsholaqov osylaı dep pikirin bildirdi, dep habarlaıdy QazAqparat tilshisi.
«Qazir Qazaqstandaǵy búkil medıtsınanyń aldyndaǵy maqsat – indetten shyǵý. Osy jaǵdaıdan shyqqannan keıin meniń oıymsha, medıtsınanyń kóp qyryn qaıtadan oılaný kerek sekildi. Álbette buǵan deıin de medıtsına salasy jumys istemedi dep eshkim de aıta almaıdy. Alaıda indetti eshkim kútpedi, boljap bilgen joq. Sondyqtan bizdiń aldymyzdaǵy mindet – sanıtarlyq-epıdemıologııalyq qyzmetti kúsheıtý degen oıdamyn. Sala mamandarynyń bul sharýany eńsererine senemin», - dedi Serik Aqsholaqov QazAqparat tilshisine telefon arqyly bildirgen pikirinde.
Onyń aıtýynsha, densaýlyq saqtaý salasyna qatysty kodeks jobasyn talqylaýǵa medıtsınanyń bilikti mamandarynyń bári de qatysady.
«Bárinen buryn qazir osy jaǵdaıdan tezirek shyǵý mańyzdy degen oıdamyn. Barlyq kúsh pen oıdy soǵan jumyldyrý kerek. Eń birinshi másele – halyqqa durystap túsindirý kerek. Sebebi ár jerde ártúrli aqparat bar. Vırýsty bireýler moıyndaǵysy kelmeıdi. Qazir halyq dúnıe júziniń barlyq aqparatyn qabyldaıtyn jaǵdaıda. Bireý bilip, bireý bilmeı ártúrli aqparatty taratyp jatyr», - dedi ol.
Serik Aqsholaqov Halyq densaýlyǵy jáne densaýlyq saqtaý júıesi týraly jańa kodeks jobasyna engiziletin usynystardyń bárin ábden talqydan ótkizý kerektigin aıtyp ótti.
«Qazirgi másele – halyqqa aqparatty durystap túsindirý. Aılap úılerine barmaı júrgen qanshama dáriger bar. Sondyqtan kóshege shyǵý, qydyrý, otyrys jasaý – bárin qoıý kerek dep oılaımyn. Árıne otbasyn asyraý úshin qarajat kerek. Osyny eskerip, Úkimet jumys oryndaryn aqyryndap iske qosyp jatyr. Soǵan túsinistikpen qarasa dep oılaımyn. Kodeks jobasyna óz salamyzǵa qatysty usynystardy engizemiz. Ol bir kúndik sharýa emes», - dedi ol.
Eske sala ketsek Memleket basshysy búgingi málimdemesinde daǵdarystan keıin Qazaqstan medıtsınany damytýǵa basa mán beretinin málim etken edi. Bul salaǵa memleket tarapynan aýqymdy qoldaý kórsetiledi. Prezıdenttiń tapsyrmasy boıynsha Úkimet Halyq densaýlyǵy jáne densaýlyq saqtaý júıesi týraly jańa kodeks jobasyna osy salany jetildiretin naqty usynystar engizýge tıis.
