Serik Aqsholaqov elimizde neırohırýrgııanyń damýyna eren eńbek sińirdi - Elbasy

ASTANA. QazAqparat - Búgin Aqordada Qazaqstan azamattarynyń bir tobyn memlekettik nagradalarmen marapattaý barysynda Elbasy Nursultan Nazarbaev Serik Aqsholaqov elimizde neırohırýrgııanyń damýyna eren eńbek sińirgendigin atap ótti.

Medıtsına ǵylymdarynyń doktory, professor  S.Aqsholaqov «Ulttyq neırohırýrgııa ortalyǵy» AQ-nyń basqarma tóraǵasy bolyp tabylady, dep habarlaıdy QazAqparat.

«Bıyl «Qazaqstannyń Eńbek Eri» ataǵymen marapattalǵandardyń biri Serik Qýandyquly Aqsholaqov. Ol elimizde neırohırýrgııanyń damýyna eren eńbek sińirip, osy salaǵa basshylyq etýde. Otandyq ǵylym men medıtsınaǵa ınvestıtsııalyq tehnologııany engizýge zor úlesin qosyp, eńbegimen tek Qazaqstanda ǵana emes, óz mamandarynyń arasynda, basqa elderde de belgili bolyp, talaı azamattardyń janyn alyp qalǵan adam. Sondyqtan uly mereke kúni osyndaı marapatqa ıe bolyp otyr», - dedi Elbasy.  

Sonymen qatar Memleket basshysy 30 jyl boıy aýyl sharýashylyǵynda tabandy eńbek etip kele jatqan  «Qarasý» SÓK» JShS bas dırektory Tursynov Almat Janábilulynyń da «Qazaqstannyń Eńbek Eri» atanǵanyn atap ótti.

«Ol basqaratyn kásiporyn óz ónimderin elimizdiń ishine ǵana emes, sonymen birge eksportqa shyǵarýdy da jolǵa qoıǵan. Innovatsııalyq tehnologııalardy da belsendi engizý ústinde. Áleýmettik salanyń da damýyna qoldaý bildirip keledi», - dep atap ótti Nazarbaev.