Serik Ahmetovtiń jaqtastarynyń biri qamaýdan bosatylady
QARAǴANDY. QazAqparat - Burynǵy Premer-Mınıstr Serik Ahmetovke qatysty atyshýly sybaılas jemqorlyq isi boıynsha sottalǵandardyń biri «Metallýrgııa-Metallóńdeý» ındýstrıaldyq parki» JShS burynǵy dırektory Bolatbek Ysqaqov oqshaýlaǵyshtan shyǵarylady, dep habarlady «QazAqparat» HAA tilshisi.
Qaraǵandy qalasy Qazybek bı aýdandyq sotynyń baspasóz qyzmetiniń habarlaýynsha, sot qaýlysymen Ysqaqovqa qatysty merziminen buryn shartty túrde bosatý týraly norma qabyldandy.
«Sottalýshy Ysqaqov Bolatbek Jumabekulynyń merziminen buryn bosatý týraly ótinishi qanaǵattandyryldy. Buǵan deıin bıylǵy aqpan aıynda Ysqaqovqa qatysty «QR Táýelsizdiginiń 25 jyldyǵyna baılanysty raqymshylyq týraly» zań normasy qabyldandy jáne Zań kúshine engen sátten bastap onyń jaza óteý merziminiń 1/4 bóligi, ıaǵnı 1 aı 14 kúni qysqardy. Qazirgi ýaqytta Ysqaqov áli 1 aı 23 kún jazasyn óteýi tıis», - dep habarlady Qaraǵandy qalasy Qazybek bı aýdandyq sotynyń baspasóz qyzmeti. Endi 1 aı 23 kún Ysqaqov probatsııalyq baqylaýda bolady, oǵan Qaraǵandy oblysy QAJ departamentiniń probatsııa qyzmetine habarlamaı turǵylyqty jerin aýystyrýǵa jáne 23:00-den keıin oıyn-saýyq mekemelerinde bolýǵa tyıym salynǵan.
Zań kúshine engen soń, is júzinde bosatylǵan Bolatbek Ysqaqov úkim shyqqaly otyrǵan AK 159/1 oqshaýlaǵyshynan shyǵarylady.
Eske sala ketsek, «Metallýrgııa-Metallóńdeý» ındýstrıaldyq parki» JShS burynǵy dırektory Bolatbek Ysqaqov QR QK 176-baby («Senip tapsyrylǵan bóten múlikti ıelený nemese ysyrap etý») boıynsha qylmys jasaýda aıypty dep tanyldy. Oǵan 3,6 jylǵa bas bostandyǵynan aıyrý túrindegi jaza taǵaıyndaldy. Atap aıtqanda, burynǵy Premer-Mınıstr Serik Ahmetov QR QK 176-baby («Senip tapsyrylǵan bóten múlikti ıelený nemese ysyrap etý»), 310-baby («Kásipkerlik qyzmetke zańsyz qatysý») jáne 307-baby («Qyzmettik laýazymyn asyra paıdalaný») boıynsha qylmystardy jasaǵany úshin 8 jylǵa bas bostandyǵynan aıyryldy.
