Serik Ahmetovtiń qylmystyq isine qatysty taǵy bir sottalýshynyń jazasy aıyppulmen almastyryldy
QARAǴANDY. QazAqparat - Úsh jylǵa bas bostandyǵynan aıyrylǵan «Saryarqa» áleýmettik-kásipkerlik korporatsııasy» Ulttyq kompanııasy» AQ aktıvter departamentiniń burynǵy dırektory Erlan Qısyqbaevtyń jazasyn óteý merzimi aıyppul tóleýge almastyryldy, dep habarlaıdy «QazAqparat» HAA tilshisi.
Sot QR Qylmystyq kodeksiniń 73-baby «Jazanyń ótelmegen bóligin neǵurlym jeńil jaza túrimen aýystyrý» boıynsha onyń jazasyn óteý merzimin aıyppulǵa almastyrdy.
Qaraǵandy oblystyq soty habarlaǵandaı, onyń minezdemesiniń, túzetý mekemesindegi tártibiniń jaqsy bolýy jáne AK 159/1 jumysyna belsene qatysqany eskerilip, sottalýshynyń ótinishi qanaǵattandyryldy.
«Qaraǵandy oblystyq soty qylmystyq is boıynsha alqasynyń qaýlysyna sáıkes, jazasynyń ótelmegen merzimi 170 myń teńge kólemindegi aıyppulmen almastyryldy», - dep habarlady sotta.
Qaraǵandy oblystyq qylmystyq is boıynsha mamandandyrylǵan aýdanaralyq sotynyń 2015 jylǵy 11 jeltoqsandaǵy úkimimen Erlan Qısyqovke 3 jyl bas bostandyǵynan aıyrý jazasy taǵaıyndalǵan edi.
Sot ony QR QK 362 -baby 3-tarmaǵy «Jaýapty memlekettik laýazymdaǵy tulǵanyń óz ókilettigin asyra paıdalanýy» boıynsha aıypty dep tanyǵan.
Eske sala keteıik, 2015 jyly jeltoqsan aıynda Qaraǵandy oblysynyń qylmystyq ister jónindegi mamandandyrylǵan aýdanaralyq soty burynǵy premer-mınıstr S. Ahmetov pen basqa da laýazymdy tulǵalarǵa qatysty is boıynsha úkimi shyǵardy .
Atalmysh is boıynsha 7 túrli epızodqa sáıkes barlyǵy 21 adam aıyptalǵan bolatyn. Sot talqylaýy 2015 jylǵy 10 tamyzda bastalyp, tórt aıǵa sozyldy. Sot tergeýi men sot jaryssózderi 2015 jylǵy 9 jeltoqsanda aıaqtaldy.
Qaraǵandy oblystyq sotynyń qylmystyq ister boıynsha apellıatsııalyq soty 2016 jyldyń 14 naýryzynda jemqorlyq qylmystyq iske qatysty sotty bolǵan 11 adamnyń jazasyn jeńildetti. Sonyń ishinde Serik Ahmetovtiń jazasy 10 jyldan 8 jylǵa deıin azaıtyldy .
