Serik Ahmetovtiń isi boıynsha kýáger bıýdjet qarajatyn ıelený shemasy jaıynda aıtyp berdi
QARAǴANDY. QazAqparat - Qaraǵandy oblystyq sotynda Serik Ahmetov pen basqa da joǵary laýazymdy sheneýnikterdiń qylmystyq isi boıynsha kýágerlerdi tyńdaý jalǵasýda. Sot Qaraǵandy ındýstrıaldyq parkin salý kezinde bıýdjettik qarajatty qymqyrý týraly epızodtardy talqylaýda.
Budan buryn sot otyrysy barysynda is boıynsha aıyptalýshylardyń biri - Qazaqstan ónerkásiptik korporatsııasynyń bas dırektory Áljan Aqmoldaev kýáger retinde sóz sóılep, Serik Ahmetovtiń qamqorlyǵynyń arqasynda onyń kompanııasy Qaraǵandy ındýstrıaldyq park ınfraqurylymdyq nysandaryn salýǵa tıimdi qosalqy merdiger alǵanyn málimdegen.
Odan ári Á. Aqmoldaev dırektory D. Nurbaev bolyp tabylatyn «SapaProjektGroup» JShS-ny jabdyqtardy jetkizýshi retinde tartqany belgili boldy.
Sot otyrysy barysynda «Somnýs» JShS dırektory N. Elǵondın sóz sóıledi. Onyń aıtýynsha, D. Nurbaev oǵan jabdyq jetkizýge kómek kórsetý ótinishimen júgingen. Onymen burynnan dostyq qarym-qatynasta bolǵandyqtan, ári usynylǵan syıaqy úshin kelisken.
Jaýap beıne baılanys arqyly júrgizildi, osyǵan baılanysty aıyptaý tarapy N. Elǵondın rastaǵan, sot aldy tergeý barysynda alynǵan kýágerdiń aıǵaǵyn jarııalady.
«2012 jyldyń basynda maǵan stýdent kezimnen bergi dosym Nurbaev júgindi. Ol meniń shetelden jabdyq jetkizýmen aınalysatyn fırmamnyń bar ekenin bilgen soń, mynadaı ótinishpen keldi. Ol Qaraǵandy qalasynda «SapaProjektGroup» JShS-dan aqsha túsetin aýqymdy kelisimsharty bar ekenin aıtty. Nurbaev kelisimshart boıynsha tapsyrys berýshige keminde 2 mln AQSh dollary somasynda qarajatty qaıtarý qajettigin, al odan ári tapsyrys berýshiniń sheshimi boıynsha bolady dedi. Ol bul ne qylǵan kelisimshart, onyń máni ne, maǵan egjeı-tegjeıin túsindirmedi. Nurbaev tapsyrys berýshige aqsha qaıtarý úshin oǵan basqa fırmalar kómegimen «SapaProjektGroup» JShS arqyly qolma-qol aqsha alý qajettigin málimdedi. Sosyn osyndaı fırma retinde «Somnýs» JShS-ny tartýdy ótindi, ol úshin joba sońynda materıaldyq syıaqyǵa - Toyota Land Cruiser Prado (...) kóligin beretin boldy. Birneshe aptadan keıin Nurbaev bul shema úshin taǵy da birneshe fırma qajettigin aıtty, mende kelisýge bolatyn dostarym baryn aıttym», - dep kýágerdiń aıǵaǵyn oqydy memlekettik aıyptaýshy.
N. Elǵondınniń aıtýynsha, qosymsha fırma retinde «PerfectEducation» JShS men «Gepipetrade JShS tartylǵan, olardyń basshylyǵy ózderiniń aldyndaǵy qaryzyn esepten shyǵarsa, qatysýǵa kelisetinderin aıtqan.
«Gepipetrade» JShS men «SapaProjektGroup»JShS somasy 117 mln. 549 myń teńgege tehnologııalyq jabdyqty jetkizýge shart jasasqan. «PerfectEducation» JShS «SapaProjektGroup» JShS-men somasy 504 mln. 770 myń teńgege osyndaı shart jasasqan. «Somnýs» JShS jáne «SapaProjektGroup» JShS esebine 657 mln. 768 myń teńge túsken. «SapaProjektGroup» JShS-dan «Gepipetrade» JShS, «PerfectEducation» JShS jáne «Somnýs» JShS-ǵa túsken barlyq aqsha - 1 mlrd. 280 mln. 88 myń teńge, jalpy somanyń 60 paıyzyn Nurbaevqa berdim de, qalǵan aqsha jabdyqtar men materıaldar satyp alýǵa jumsaldy, bul ispen tolyqtaı Nurbaev aınalysty», - dedi aıǵaqty oqyǵan memlekettik aıyptaýshy.
Qorǵaý tarapy memlekettik aıyptalýshy oqyǵandyqtan, aıtylǵan aıǵaqtarǵa kúmán keltirgenin atap ótken jón, alaıda sot bul qoldaýhatty qabyldamady.
