Serik Ahmetov jazasyn óteýshilerdiń arasynda úlgili bolǵan
QARAǴANDY. QazAqparat - Qaraǵandy oblysy Qarabas aýylyndaǵy AK 159/18 mekemesinde jazasyn ótep júrgen eldiń burynǵy Premer-Mınıstri Serik Ahmetov tártibine ekinshi ońtaıly dáreje berildi, dep habarlaıdy QazAqparat.
Qylmystyq-atqarý júıesi departamentiniń baspasóz hatshysy Esimjan Baıtasovtyń habarlaýynsha, bas bostandyǵynan aıyrý ornynda Serik Ahmetov úlgi bolarlyqtaı tártibi arqyly ózin jaqsy qyrynan kórsete bildi. Ol ishki tártiptiń barlyq talaptaryn oryndap, kolonııanyń qoǵamdyq ómirine belsendi túrde atsalysty. Osy oraıda ol jazasyn jeńildetý týraly sheshimge laıyqty boldy.
«AK 159/18 mekemesi ortasha qaýipsizdiktiń nysany bolyp tabylady. Jaqsy tártibiniń nátıjesinde Serik Ahmetov jazasyn jeńildetilgen jaǵdaıda óteýge aýystyryldy», - dedi E. Baıtasov.
Sottyń málimetine qaraǵanda, S. Ahmetov tártibiniń ekinshi ońtaıly dárejesin ıelenip, onda eńbekke adal qarym-qatynasy men jaqsy tártibi úshin 4 retten gramota men marapatqa ıe boldy.
5 qyrkúıekte Serik Ahmetovke jazanyń ótelmegen bóligin sot dál sol merzimge bas bostandyǵyn shekteý jazasyna almastyrdy. Bul jaza merzimin ol turǵylyqty jerinde jalǵastyrady. Sot qaýlysy 2017 jylǵy 21 qyrkúıekte zańdy kúshine enedi.
Eske sala keteıik, 2015 jyly jeltoqsan aıynda Qaraǵandy oblysynyń qylmystyq ister jónindegi mamandandyrylǵan aýdanaralyq soty burynǵy Premer-mınıstr S. Ahmetov pen basqa da laýazymdy tulǵalarǵa qatysty is boıynsha úkim shyǵardy. Osyǵan deıin ol 1 jyl merzimde «úı qamaqta» boldy.
Qaraǵandy oblystyq sotynyń qylmystyq ister boıynsha apellıatsııalyq soty 2016 jyldyń 14 naýryzynda jemqorlyq qylmystyq iske qatysty sotty bolǵan 11 adamnyń jazasyn jeńildetti. Sonyń ishinde Serik Ahmetovtiń jazasy 10 jyldan 8 jylǵa deıin azaıtyldy.
Sonymen qatar bıylǵy 19 qańtarda raqymshylyqqa baılanysty Serik Ahmetovtiń jazasyn óteý merzimi 1 jyl 7 aı 11 kúnge qysqardy.
