Serik Ahmetov sybaılastarymen memleketke 17 mln teńge shyǵyndy tóleýi tıis
QARAǴANDY. QazAqparat - Qaraǵandy oblystyq sotynyń azamattyq is jónindegi apellıatsııalyq alqasy burynǵy premer-mınıstr Serik Ahmetov, oblystyń burynǵy ákimi Baýyrjan Ábdishev, Qaraǵandynyń burynǵy ákimi Meıram Smaǵulov, Qaraǵandy ákiminiń burynǵy orynbasary Muqtar Adambekov jáne TKSh bóliminiń burynǵy basshysy Aıdos Jákenovti zalaldyń ornyn toltyrý retinde memleketke 17 mıllıon 310 myń teńge tóleýdi mindettedi, dep habarlady sot zalynan «QazAqparat» HAA tilshisi.
Bas jaýapker jáne Qaraǵandy ákimi tulǵasynda talapker Nurlan Áýbákirov olardyń talaptaryn oryndaýdan bas tartqan alqa sheshimine qanaǵattanbady. Atap aıtqanda, Qaraǵandy ákimi shyǵyn óndirip alýdy ulǵaıtýdy, al jaýapker shyǵyn somasyn joıýdy, azamattyq is boıynsha óndiristi toqtatýdy surady. «Apellıatsııalyq alqa qaýly etti: Qazybek bı atyndaǵy aýdan soty Ahmetov Serik Nyǵmetuly, Ábdishev Baýyrjan Túıteıuly, Smaǵulov Meıram Ahmedııauly, Adambekov Muqtar Ermekbaıuly, Jákenov Aıdos Ǵıbadýllaulynan memleketke keltirilgen 17 mıllıon 310 myń teńge kólemindegi materıaldyq shyǵynnyń ornyn toltyrý týraly sheshimi ózgerissiz, talapker men jaýapkerdiń apellıatsııalyq shaǵymdary - qanaǵattandyrýsyz qaldyrylsyn», -dep qaýlyny oqydy apellıatsııalyq alqa sýdıasy.Ol Joǵarǵy sotqa kassatsııalyq shaǵym bere me, ol jaǵy belgisiz. Ákimdik zańgeri Jandos Ysqaq ákimniń odan ári áreketi talqylaný ústinde ekenin aıtty. 17 mln 310 myń teńge - Serik Ahmetov pen onyń burynǵy tórt baǵynysty qyzmetkeri Ábdishev Baýyrjan Túıteıuly, Smaǵulov Meıram Ahmedııauly, Adambekov Muqtar Ermekbaıulynyń zańsyz áreketterinen memleketke keltirgen materıaldyq shyǵyn somasy. Bes jaýapker qýynym talabyn tolyq kólemde moıyndamaıdy.
