Serik Ahmetov «Pro Team Astana» velokomandasynyń múshelerin qabyldady
ASTANA. 7 maýsym. QazAqparat - QR Premer-Mınıstri Serik Ahmetov «Pro Team Astana» velokomandasynyń músheleri Vınchentso Nıbalı, Maksım Iglınskıı, Paolo Tıralongony jáne komandanyń bas menedjeri Aleksandr Vınokýrovty qabyldady,
dep habarlady primeminister.kz saıty.
Úkimet basshysy komandany «Djıro d'Italııa-2013» Grand-týrda aıqyn jeńiske jetýlerimen quttyqtap, odan ári de joǵary sporttyq kórsetkishterge qol jetkize berýlerine tilektestik bildirdi.
«Biz úshin «Astana» velokomandasynyń dúnıejúzilik Grand-týrlarǵa qatysýy asa mańyzdy, sondyqtan, biz komandamyzdyń tabystaryn jiti qadaǵalap otyramyz jáne oǵan budan ári de jan-jaqty kómek kórsetýge daıynbyz», - dedi S.Ahmetov.
A.Vınokýrov Premer-Mınıstrge qoldaý kórsetkeni úshin alǵys aıtyp, «Astana» velokomandasynyń jeńisi komandanyń álemdegi myqtylardyń biri ekenin taǵy bir dáleldegendigin atap ótti.
