Serik Ahmetov memlekettik organdarǵa 29 tamyzǵa deıin jańa oqý jylyna daıyndyqty aıaqtaýdy tapsyrdy
ASTANA. 21 tamyz. QazAqparat - Búgin QR Premer-Mınıstri Serik Ahmetovtiń tóraǵalyǵymen selektorlyq rejımde Úkimette ótken keńeste 2013-2014 jańa oqý jylyna daıyndyqty uıymdastyrý máseleleri talqylandy.
Bul týraly primeminister.kz saıtynda habarlandy.
QR Bilim jáne ǵylym mınıstri B.Jumaǵulovtyń aıtýynsha, «aldaǵy oqý jylynda respýblıka mektepterinde 2,5 mıllıonnan astam shákirt bilim alatyn bolsa, qyrqúıektiń basynda mektepterde 292 064 ustaz, onyń 9645-i jas muǵalimder jumysqa kirisetin bolady. Búgingi kúnge matematıka, hımııa, fızıka, aǵylshyn tili sııaqty salalyq pánder boıynsha barlyǵy 1934 muǵalimge suranys bar».
B.Jumaǵulovtyń habarlaýynsha, «Mektepke jol» aktsııasy sheńberinde 15184 balaǵa barlyǵy 59 mln. teńgeden astam qarjynyń kómegi kórsetildi. Jalpyǵa birdeı bilim berý qorynyń qarjysyn 3%-ǵa deıin arttyrý maqsatynda 8,5 mıllıardtan astam teńge bıýdjettik qarjy qarastyrylǵan.
Mınıstrdiń sózine qaraǵanda, ústimizdegi jyldyń 1 qyrqúıegine bıylǵa josparlanǵan 159 jańa mekteptiń 77-si ashylsa, qalǵanyn osy jyldyń sońyna deıin paıdalanýǵa berý josparlanýda. Kúrdeli jóndeýdi qajetsingen 439 mekteptiń 32%-yn jóndeýge qoıý qarastyrylyp, oǵan 19,3 mlrd. teńge, onyń ishinde «Jumyspen qamtý jol kartasy-2020» baǵdarlamasy boıynsha 14,2 mlrd. teńge bólinedi.
Mınıstr sonymen qatar, 6 183 mektepte ondaǵy oqýshylardyń 80%-na ystyq tamaq beriletinin, 2015 jylǵa qaraı bul kórsetkishti 100%-ǵa jetkizý kózdelip otyrǵanyn, tegin tamaqpen negizinen áleýmettik az qamtylǵan otbasylardan shyqqan balalardyń qamtylyp otyrǵanyn aıtty.
Keńeste sondaı-aq Densaýlyq saqtaý mınıstri S.Qaıyrbekova, Tótenshe jaǵdaılar mınıstri V.Bojko, Aqtóbe oblysy ákimi A.Muhambetov, Almaty oblysynyń ákimi A.Musahanov, Ońtústik Qazaqstan oblysy ákiminiń orynbasary S.Qanybekovtiń esepteri tyńdaldy.
Keńesti qortyndylaı kele, Úkimet basshysy Densaýlyq saqtaý men Tótenshe jaǵdaılar mınıstrleriniń nazaryn medıtsınalyq qyzmet kórsetý, ystyq tamaqpen qamtý, sanıtarlyq talaptardy, órt qaýypsizdigi erejelerin saqtaý boıynsha qatań baqylaý jasaý qajettigine aýdardy.
S.Ahmetov jańa oqý jylyna bilim berý mekemeleri daıyndyǵynyń mańyzdylyǵyn ataı otyryp, «mektepter kóptegen aýdan ortalyqtary, aýyldar men eldi mekender úshin bilim men mádenıet ortalyqtary bolyp tabylady, sondyqtan bul máseleler jergilikti atqarýshy organdarmen birge, ortalyq atqarýshy organdar úshin de basymdyqty másele bolýy tıis»,-dedi Úkimet basshysy.
Memleket basshysynyń tapsyrmasyn oryndaý maqsatynda, S.Ahmetov apatty mektepter men úsh aýysymdyq mektepterdi joıý mindetin qoıdy. «Úshjyldyq bıýdjetti qalyptastyrý kezinde ákimder bilim berý salasyn qarjylandyrýǵa baılanysty máselelerdi qatań qoıýy qajet»,-dep túıindedi S.Ahmetov.
Úkimet basshysy sondaı-aq oblystar ákimderine, Bilim jáne ǵylym mınıstrligine tıisti memlekettik organdarmen birlesip 29 tamyzǵa deıin jańa oqý jylyna daıyndyqty aıaqtaýdy tapsyrdy. ÓDM-ge salynyp jatqan mektepterdi ýaqytynda paıdalanýǵa berý, órt qaýypsizdigi men sanıtarlyq normalardy saqtaýǵa baqylaý jasaý mindetteldi.
