Serik Ahmetov QR-nyń shetelderdegi dıplomatııalyq ókildikteri basshylarymen ınvestıtsııa tartý máseleleri jóninde beınekonferentsııa ótkizdi
Bul tapsyrmany Memleket basshysy osy jylǵy 14 aqpandaǵy Úkimettiń keńeıtilgen otyrysy barysynda aıtqan bolatyn.
Keńeste Premer-Mınıstrdiń orynbasary - ındýstrııa jáne jańa tehnologııalar mınıstri Áset Isekeshev, birqatar dıplomatııalyq ókildikterdiń basshylary sóz sóıledi.
Keńesti asha otyryp, Serik Ahmetov «qazirgi kezde arnaıy jumys toby qurylýda, onyń aýqymynda taıaýdaǵy ýaqytta ınvestorlar úshin jańa yntalandyrý joldaryn pysyqtap, ınvestıtsııalar tartýdyń keshendi josparyn jasaý qajet», - dep atap ótti.
«Qazaqstandyq elshilikter bul baǵytta belsendirek jumys jasaýy tıis jáne biz sizderden naqty nátıjeler kútemiz», - dedi Premer-Mınıstr dıplomattarǵa qarata aıtqan sózinde. Úkimet basshysy Qazaqstan ınvestıtsııalar úshin ashyq, dep atap kórsetti.
«Biz ınvestorlar úshin barlyq jaǵdaılar jasaımyz. El Prezıdentiniń naqty tapsyrmasy bar: ınvestorlar úshin móldir qaǵıdalar jasaý qajet. KO men BEK aýqymyndaǵy bizdiń salyq salý júıemiz eń tartymdy ekenin eskeretin bolsaq, Qazaqstan ınvestorlar úshin jaqsy alań», - dedi S.Ahmetov. Keńestiń qorytyndysymen S.Ahmetov QR SІM-ge, dıplomatııalyq ókildikter basshylaryna transulttyq korporatsııalardyń, iri kompanııalardyń basshylarymen kezdesýler ótkizýdi tapsyrdy.
«Biz qandaı salalarda yntymaqtasýymyz qajet ekendigin jiti bilýge tıispiz. Qazaqstanda jumys jasaýǵa tilek bildirgen áleýetti ınvestorlardyń tizimi aǵymdaǵy jyldyń 10 naýryzyna deıin qalyptastyrylýy tıis», - dep qosty Premer-Mınıstr.
Sonymen qatar, Úkimet basshysy sheteldik ınvestorlardyń qazaqstandyq áriptesterimen kezdesýlerin uıymdastyrýǵa nusqaý berdi. «Bul jumysqa barlyq salalyq memlekettik organdardy, holdıngilerdi, ulttyq kompanııalardy jáne Ulttyq kásipkerler palatasyn tartý qajet. Onyń nátıjesi naqty ýaǵdalastyqtar bolýy qajet», - dep atap kórsetti S.Ahmetov. Premer-Mınıstr sondaı-aq ókiletti organdarǵa, ulttyq kompanııalarǵa «qazaqstandyq ónimderdi eksportqa jyljytýǵa baǵyttalǵan saýda mıssııalaryn ótkizý josparyn jasaýdy» tapsyrdy.