Serik Ábdenov «QTJ» jastarynyń qaıyrymdy isterin atady

ASTANA. QazAqparat - «Qazaqstan temir joly» kompanııasy jas mamandardyń biliktiligin arttyrýǵa bıyl 1 mlrd 100 mln teńge jumsaıdy. Bul týraly búgin «Qazaqstan temir joly» UK» AQ basqarma tóraǵasynyń korporatıvtik máseleler jónindegi orynbasary Serik Ábdenov aıtty, dep habarlaıdy QazAqparat tilshisi.

«Búginde kompanııa quramynda 137 myń adam jumys istese, onyń 40 paıyzy - jastar. 2018 jyly jastardy oqytý jáne biliktiligin arttyrý sharalaryna 1 mlrd teńgege jýyq qarajat jumsadyq. Bıyl bul qarajat kólemi birshama ósip, 1 mlrd 100 mln teńgege jetetin bolady», - dedi ol.

Osy rette Serik Ábdenov kompanııa tarapynan jastardy qoldaýǵa arnalǵan naqty jobalarǵa keńinen toqtaldy. Máselen, jyl saıyn «Joba menedjment» óńirlik ınnovatsııalyq konkýrsy ótkizilip, oǵan kompanııada jumys isteıtin 1600 jas qatysady. Ótken jyly 13 joba iriktep alynyp, odan ary júzege asyrý úshin saraptamalyq baǵalaýdan ótkizilip jatyr. Munan bólek, jyl saıyn «Jas maman» jastar syılyǵyn berý baıqaýy úzdik temirjolshy, baılanysshy, jolserik, vagonshy syndy 24 atalymda ótkiziledi. Sonymen qatar, kompanııa jas mamandardy daıarlaýǵa erekshe kóńil bóledi. Bul baǵytta jyl saıyn temir jol salasyndaǵy joǵary oqý oryndarynda jaqsy oqyp júrgen jastarǵa bilim granttary men ataýly stıpendııalar taǵaıyndalyp otyrady. Atap aıtqanda, sońǵy 3 jylda «Magıstral» baǵyty boıynsha 60 bilim granty men 33 ataýly stıpendııa berildi. M.Tynyshbaev atyndaǵy Qazaq kólik jáne kommýnıkatsııalar akademııasynyń stýdentterine de kompanııa kásiporyndarynda óndiristik taǵlymdamadan ótýge múmkindik jasalǵan. Ótken jyly akademııanyń 53 stýdentine 3 mln teńgege jýyq shákirtaqy tólengen.

Serik Ábdenovtiń aıtýynsha, «Qazaqstan temir joly» jastary qaıyrymdylyq sharalarǵa da óz erkimen belsene aralasyp júr.

«Máselen, Astana qalasynda magıstraldy temir jolda jumys isteıtin azamatymyzdyń úıinde eki balasy naýqas. Jyl saıyn Astana qalasyndaǵy jastar onyń otbasyna bas suǵyp, kómek kórsetip turady. Bul - basshylyqtyń tapsyrmasy emes, jastardyń óz bastamasy. Aqtóbege qarasty Alǵa balalar úıine jastarymyz baryp, túrli sharalar uıymdastyryp turady. Semeıde jas jumysshylarymyz balalar úıiniń tárbıelenýshilerin 10 kúnge deıin úılerine surap alyp ketip, tálim-tárbıe beredi. Qyzylorda jastary da dál osyndaı qaıyrymdylyq sharalaryn jasap júr», - dedi basqarma tóraǵasynyń orynbasary.