Sergeı Zverev qazaq tilinde án shyrqady (VIDEO, FOTO)
ASTANA. QazAqparat - Qazaqstandyq ánshi Dıana Sharapova reseılik shoý-bıznes juldyzy Sergeı Zverevti qazaq tilinde án aıtýǵa úıretti. 1 jeltoqsan kúni «Novogodnıı bal» ániniń orys tilindegi nusqasynyń klıpi tanystyryldy, al bir aptadan soń ánshiler atalmysh ánniń qostanaılyq aqyn Erkin Súıinbaı sózin jazǵan qazaq tilindegi tól nusqasyn jaryqqa shyǵarýdy qolǵa aldy, dep habarlaıdy Mironov Entertainment agenttiginde.
«Bul ońaı bolmady, ánniń qazaq tilindegi nusqasyn men bir apta boıy úıde tyńdadym. Men qazaq álipbıinde orys tilindegiden góri áripter kóp ekenin, olardyń dybystalý erekshelikteri týraly bildim. Endi N men Ń-dy, O men Ó-ni ońaı aıyra alamyn», - deıdi S.Zverev. Dıana Sharapovanyń prodıýseri Roman Mıronovtyń aıtýynsha, atalmysh klıpti túsirýdi Sergeıdiń ózi usynǵan. Aıta keteıik, Sergeı Zverev jasóspirim shaǵynda Óskemen qalasynda turǵan.
