Sergeı Tsyrýlnıkov Qazaqstan aýyr atletıka federatsııasynyń vıtse-prezıdenti bolyp taǵaıyndaldy

Federatsııanyń málimetinshe, bul sheshim Sergeı Tsyrýlnıkovtyń qazaqstandyq sportty damytýǵa qosqan kópjyldyq úlesi men adaldyǵyna negizdelgen.

— Bul — sanaly ári salmaqty tańdaý. Sergeı uzaq jyldar boıy salaýatty ómir salty men sportty nasıhattap, sportshylardy, jastardy jáne elimizdiń sporttyq rýhyn nyǵaıtýǵa baǵyttalǵan bastamalardy turaqty túrde qoldap keledi. Qazaq mádenıetinde «batyr» degen erekshe uǵym bar. Ol — tek erjúrek adam ǵana emes, óz isine jáne Otanyna adal, abyroıly tulǵa. Sergeı Tsyrýlnıkov dál osyndaı azamat. Onyń boıynan otansúıgishtik, adaldyq, jaýapkershilik jáne elge paıdasyn tıgizýge degen shynaıy nıet aıqyn kórinedi, — dep atap ótti Federatsııa ókilderi.

Sport uıymynyń habarlaýynsha, Sergeı Tsyrýlnıkov Federatsııanyń qundylyqtaryn tolyq qoldaıtyn, adamdardy bir maqsatqa jumyldyra alatyn, jeke úlgisimen ózgelerge jiger beretin ári otandyq sporttyń damýyna úles qosatyn tulǵa.

— Sergeı Tsyrýlnıkovtyń tájirıbesi, qajyr-qaıraty men isine degen adaldyǵy Qazaqstandaǵy aýyr atletıkanyń odan ári damýyna eleýli úles qosatynyna senimdimiz, — dep málimdedi Qazaqstan aýyr atletıka federatsııasy.

Sergeı Tsyrýlnıkov — Qazaqstan Respýblıkasynyń izgi nıet elshisi, «Qurmet» jáne «Dostyq» memlekettik ordenderiniń, sondaı-aq túrli vedomstvolyq marapattardyń ıegeri. Sonymen birge ol Qazaqstan Respýblıkasy Týrızm jáne sport mınıstrliginiń resmı ambassadory.

Ol — Gınnestiń rekordtar kitabyna jeti rekord engizgen rekordsmen, álem jáne Qazaqstan rekordtarynyń birneshe dúrkin ıegeri, sondaı-aq kóptegen áleýmettik jáne qaıyrymdylyq jobalardyń avtory.

Sergeı Tsyrýlnıkov — Qazaqstannyń paýerlıftıngten sport sheberi jáne kúshtik óner kórsetýler boıynsha álem rekordshysy. Ol sondaı-aq álemge tanymal America’s Got Talent talanttar shoýyna qatysqan.

Eske sala keteıik, buǵan deıin otandyq tóreshiler ÝEFA Konferentsııa lıgasynyń matchtaryna taǵaıyndalǵan bolatyn.