Sergeı Shoıgý Reseı Qaýipsizdik Keńesiniń hatshysy bolyp taǵaıyndaldy

ASTANA. KAZINFORM — Reseı prezıdenti Vladımır Pýtın Nıkolaı Patrýshevti Reseı Qaýipsizdik keńesiniń hatshysy qyzmetinen bosatty,  dep jazady TASS.

Vladımır Pýtın Sergeı Shoıgýdy Reseı Qaýipsizdik keńesiniń hatshysy etip taǵaıyndady.

Sergeı Kýjýgetovıch Shoıgý 1955 jyly 21 mamyrda Týva AKSR, Chadan qalasynda (qazirgi Reseı Federatsııasy, Tyva Respýblıkasy) dúnıege kelgen.

1977 jyly Krasnoıarsk polıtehnıkalyq ınstıtýtyn (qazirgi Sibir federaldy ýnıversıtetiniń quramynda) ınjener-qurylysshy mamandyǵy boıynsha bitirgen.

Ekonomıka ǵylymdarynyń kandıdaty. 1996 jyly Reseı Federatsııasy Prezıdenti janyndaǵy Memlekettik qyzmet akademııasynda (qazirgi RF Prezıdenti janyndaǵy Reseı halyq sharýashylyǵy jáne Memlekettik qyzmet akademııasy) «áleýmettik-ekonomıkalyq zııandy azaıtý maqsatynda tótenshe jaǵdaılardy boljaý kezinde memlekettik basqarýdy uıymdastyrý: jer silkinisi mysalynda» taqyrybynda dıssertatsııa qorǵady.

Reseı prezıdenti buǵan deıin Sergeı Shoıgý bolǵan qorǵanys mınıstri laýazymyna Andreı Beloýsovtyń kandıdatýrasyn usyndy. Bul týraly Federatsııa Keńesiniń Telegram-kanalyndaǵy habarlamada aıtylǵan. Burynǵy úkimette Beloýsov premer-mınıstrdiń birinshi orynbasary qyzmetin atqarǵan.

65 jastaǵy Beloýsov ár ýaqytta memleket basshysy Vladımır Pýtınniń ekonomıkalyq máseleler jónindegi kómekshisi, Reseı Federatsııasynyń Ekonomıkalyq damý mınıstri, RF Úkimetiniń Ekonomıka jáne qarjy departamentiniń dırektory, Makroekonomıkalyq taldaý jáne qysqa merzimdi boljaý ortalyǵynyń bas dırektory, 1981-2006 jyldary Reseı ǵylym akademııasynda jumys istedi.