Sergeı Shoıgý qazaqstandyqtarǵa qatysty muraǵat materıaldardy tapsyrdy

NUR-SULTAN. QazAqparat - Reseı Qorǵanys mınıstri Sergeı Shoıgý elimizge sapary barysynda biregeı muraǵattyq materıaldardy tabys etti. Bul týraly QazAqparat Qorǵanys mınıstrligine silteme jasap habarlaıdy.

Resmı sapar sheńberinde Reseı Federatsııasynyń qorǵanys mınıstri Sergeı Shoıgý Qazaqstan Respýblıkasy qorǵanys vedomstvosynyń basshysy Nurlan Ermekbaevqa 1941-1945 jyldardaǵy Ekinshi dúnıejúzilik soǵysyna qatysqan qazaqstandyqtarǵa qatysty muraǵat materıaldaryn tapsyrdy.

Birinshi toptama – «Bir Jeńistiń sarbazdary. Ekinshi dúnıejúzilik soǵysy jyldaryndaǵy Qazaqstan».

«Bizdiń muraǵattardan barlyq polkter men bólimshelerdiń tizimderi, olardyń qalaı jáne qaıda soǵysqany týraly materıaldar alyndy. Munda Bas shtab basshylary men sol kezdegi Joǵarǵy Bas qolbasshynyń jáne Stavka jetekshisiniń shynaıy qujattary men sheshimderi berilgen», – dedi Reseı Federatsııasynyń Qorǵanys mınıstri.

Sondaı-aq, Reseı qorǵanys vedomstvosynyń basshysy 1941-1942 jyldardaǵy gazettiń bastapqy shyǵarylymyn jetkizdi. Onda Máskeý túbindegi shaıqastarda panfılovshylar týraly alǵashqy málimetter jarııalanǵan.

Keńes Odaǵynyń batyry, armııa generaly, Qazaqstannyń birinshi Qorǵanys mınıstri Saǵadat Nurmaǵambetov týraly materıaldar asa baǵaly qundylyqqa aınaldy. Reseı mınıstriniń aıtýynsha, muraǵattarda barlyq qolda bar materıaldar jınaqtalǵan. Onyń ishinde qazaqstandyq tarap úshin jańalyq bolatyn derekter de bar.

Sergeı Shoıgý 2020 jyl Ekinshi dúnıejúzilik soǵysyndaǵy Jeńistiń 75 jyldyǵy ekenin atap ótti. Maýsym aıynda Qazaqstan áskeriniń bólimshesi Qyzyl alańdaǵy Jeńis sherýine qatysty. Ol sondaı-aq Qorǵanys mınıstrine, Qazaqstan muraǵattar qyzmetkerlerine «Eske alý joly» biregeı murajaıyn qurýǵa qosqan úlesi úshin zor alǵys aıtty.