Sergeı Ponomarev Prezıdentke QHA-ny damytýdyń bıylǵy josparyn tanystyrdy

ASTANA. KAZINFORM - Memleket basshysy Qazaqstandaǵy orys, slavıan jáne kazak uıymdary qaýymdastyǵynyń tóraǵasy, Parlament Májilisiniń depýtaty Sergeı Ponomarevti qabyldady, dep habarlaıdy Aqordanyń baspasóz qyzmeti.

Prezıdent – Qazaqstan halqy Assambleıasynyń Tóraǵasy Qasym-Jomart Toqaevqa jalpyulttyq biregeılikti odan ári arttyrý, el birligin nyǵaıtý, óskeleń urpaqty otanshyldyq rýhynda tárbıeleý baǵytynda Qaýymdastyqtyń atqarǵan qyzmeti týraly málimet berildi.

Sergeı Ponomarev ultty uıystyratyn faktor retinde memlekettik tildi nasıhattaýdaǵy slavıan uıymdarynyń jumysy týraly baıandady.

Sonymen qatar Qazaqstan halqy Assambleıasyn damytýdyń 2030 jylǵa deıingi «Birligimiz – áralýandyqta» tujyrymdamasyn iske asyrý aıasyndaǵy Qaýymdastyqtyń bıylǵa arnalǵan josparyn tanystyrdy.

Qasym-Jomart Toqaev etnosaralyq kelisim men birlik memlekettik saıasattyń basty baǵyttarynyń biri sanalatynyn atap ótti.

Prezıdenttiń pikirinshe, ádildik pen barshaǵa teń múmkindik jasaý – Ádiletti Qazaqstannyń negizgi qaǵıdaty.

Osy oraıda Qazaqstan halqy Assambleıasy men onyń quramyna kiretin uıymdar barlyq etnos ókilderiniń arasynda ortaq qundylyqtardy qazaqstandyq patrıotızm negizinde nasıhattaýǵa jan-jaqty yqpal etýge den qoıady.

Aıta keteıik, Prezıdent osyǵan deıin Halyqaralyq shańǵy sporty jáne snoýbord federatsııasynyń prezıdentin qabyldady.