Sergeı Lavrov Reseıde oqıtyn qazaqstandyq stýdentter úshin shekara qashan ashylatynyn aıtty

MÁSKEÝ. QazAqparat – RF Syrtqy ister mınıstrligi Reseı joǵary oqý oryndarynda bilim alyp júrgen qazaqstandyq stýdentter úshin shekaranyń ashylýyna baılanysty oń sheshimdi kútip otyr, dep habarlaıdy QazAqparat tilshisi.

«Reseıde bilim alyp júrip, bul protsesti jalǵastyrǵysy kelgen jáne eldiń JOO-na endi ǵana oqýǵa túsken sheteldik stýdentterge baılanysty týyndaǵan problema arnaıy qaraldy», - dedi Reseı Syrtqy ister mınıstri Sergeı Lavrov QR SІM basshysy Muhtar Tileýberdimen ekijaqty kezdesý qorytyndylary boıynsha ótken baspasóz máslıhaty kezinde.

«Sheshim Reseıdiń Syrtqy ister jáne bilim mınıstrlikteriniń birlesken usynystary negizinde qabyldandy. Biz barlyq eldiń, sonyń ishinde Qazaqstan stýdentteriniń bizge oqýǵa keletinderdiń arasynda birinshi bolǵanyn qalaımyz. Naqty merzim aldaǵy ýaqytta belgili bolady», - dep atap ótti S.Lavrov.

«Mundaǵy sheshim – apta saıyn elge keletin stýdentterdiń sanyn bólý. Men bul máseleniń bir aıdyń ishinde sheshiletinine senemin», - dedi reseılik SІM basshysy.

S.Lavrov sondaı-aq Qazaqstan men Reseı arasyndaǵy shekaranyń ashylýy eki taraptyń epıdemıologııalyq jaǵdaıǵa qatysty sheshimderine baılanysty ekenin qosyp ótti.

«Jalpy túsinik bar – bárimiz qalypty ómirge tezirek oralǵymyz kelip otyr. Koronavırýsqa qarsy kúres pen pandemııaǵa qatysty jalpy jaǵdaı osyny aldaǵy bolashaqta iske asyrýǵa múmkindik beretinine úmittenemin», - dep túıindedi mınıstr.